У Маскве на гіганцкі тэрмін асудзілі маладога беларуса — за падпал лакаматыва яму заплацілі ўсяго $26
Вайсковы суд асудзіў 20‑гадовага грамадзяніна Беларусі Ілью Аляшкевіча да 16 гадоў па артыкуле за тэракт, учынены групай асоб па папярэдняй змове. Яго равесніку расіяніну Антону Бакланаву далі 15 гадоў, піша «Коммерсантъ».
Паводле матэрыялаў справы, абвінавачаныя шукалі хуткі заробак у тэлеграме. За ўзнагароду 120 тысяч расійскіх рублёў (каля 1500 даляраў) ім прапанавалі падпаліць аўтаматрысу (адмысловы самаходны вагон) на станцыі Быкава ў Маскоўскай вобласці.
Хлопцы злілі бензін з аўтамабіля «Газэль» у гаражным кааператыве, пасля чаго Аляшкевіч разбіў шкло ў вагоне і падпаліў кабіну, а Бакланаў здымаў працэс на відэа для справаздачы куратару. У выніку маёмасці была нанесена шкода сумай каля 70 тысяч даляраў, хоць за выкананне задання Аляшкевіч атрымаў усяго 26 даляраў.
Кваліфікацыя справы выклікала спрэчкі паміж сілавымі структурамі. ФСБ, якая праводзіла экспертызы, не ўгледзела ў дзеяннях маладых людзей тэрарыстычных матываў або намеру на дыверсію. Супрацоўнікі ФСБ прыйшлі да высновы, што фігурантаў увялі ў зман і іх дзеянні варта кваліфікаваць як прывядзенне ў непрыдатнасць транспартных сродкаў, што прадугледжвае да аднаго года зняволення.
Аднак пасля перадачы справы ў МУС расследаванне працягнулася па артыкуле аб тэракце.
Абарона настойвала на тым, што ў падсудных не было намеру застрашыць насельніцтва або дэстабілізаваць уладу.
Падпал адбыўся глыбокай ноччу на тупіковым шляху ўдалечыні ад людзей, а агонь патушылі за восем хвілін.
Адвакаты адзначылі, што слова «Украіна» адсутнічае ў перапісках і паказаннях, а самі юнакі — адзін з якіх выхаванец дзіцячага дома, а другі сышоў з сям’і ў 17 гадоў — проста спрабавалі знайсці грошы на жыллё.
Нягледзячы на довады абароны, суддзя Юрый Масін прызначыў тэрміны, якія запытала дзяржаўнае абвінавачанне.
Цяпер чытаюць
Музыка Цім Суладзэ: Розніца 30 гадоў — тое, што адпавядае маім уяўленням пра адносіны38
Каментары