Пра ўдзел заявілі ўжо 10 краін, а фінал адбудзецца ў лістападзе ў Тайландзе, піша Бі-бі-сі.
«Адзначаючы 70‑годдзе «Еўрабачання», асабліва важна адкрыць гэтую новую главу разам з Азіяй — рэгіёнам, багатым культурай, крэатыўнасцю і талентамі. Гаворка ідзе пра развіццё «Еўрабачання» разам з Азіяй, стварэнне праекта, які адлюстроўвае галасы, ідэнтычнасць і амбіцыі рэгіёна, застаючыся верным таму, што заўсёды рабіла конкурс асаблівым», — заявіў Марцін Грын, дырэктар конкурсу.
Пра свой удзел ужо заявілі 10 краін: Паўднёвая Карэя, Бутан, Тайланд, Філіпіны, Бангладэш, Камбоджа, Лаос, Малайзія, Непал, В'етнам. Як абяцаюць арганізатары, спіс будзе папаўняцца. У найбліжэйшыя месяцы кожная краіна-ўдзельніца выбера свайго прадстаўніка праз нацыянальныя адборы — як гэта традыцыйна адбываецца і на асноўным «Еўрабачанні».
Па правілах конкурсу, песні павінны быць арыгінальнымі, а вакал жывым. Як і ў арыгінальным конкурсе, пераможцаў будуць выбіраць як прафесійныя эксперты, так і гледачы.
Трансляваць конкурс будуць тэлеканалы краін-удзельніц, але галоўным вяшчальнікам стане тайландскі Channel 3 — менавіта ў сталіцы Тайланда, Бангкоку, 14 лістапада пройдзе фінал.
Channel 3 заяўлены арганізатарам конкурсу разам з Еўрапейскім вяшчальным саюзам (European Broadcasting Union), Voxovation і S2O Productions.
«Бангкок — горад, дзе гарманічна спалучаюцца традыцыі і сучаснасць, — становіцца натуральным месцам для конкурсу, заснаванага на разнастайнасці і культурным абмене», — гаворыцца ў афіцыйным анонсе падзеі.
«Гэты горад заўсёды быў месцам, дзе сустракаюцца культуры, дзе музыка гучыць паўсюль, і дзе свята — частка паўсядзённага жыцця», — падкрэсліў прадстаўнік турыстычнага ўпраўлення Тайланда Чувіт Сірываджжакул.
Арганізатары адзначаюць, што насельніцтва азіяцкіх краін-удзельніц — больш за 600 мільёнаў чалавек, але ў Азіі пакуль няма «супастаўнай панрэгіянальнай платформы».
«Захоўваючы дух «Еўрабачання», конкурс працягвае простую, але магутную ідэю — аб'ядноўваць людзей праз музыку і агульны вопыт», — абяцаюць арганізатары.
Ужо зараз запушчаны сайт Eurovisionasia, дзе будзе з'яўляцца ўся новая інфармацыя пра конкурс.
«Еўрабачанне» было ўпершыню праведзена ў 1956 годзе. Конкурс вывеў на новы ўзровень папулярнасць такіх будучых сусветных зорак, як шведскі гурт ABBA ці канадская спявачка Селін Дыён, якая прадстаўляла Швейцарыю ў 1988 годзе.
У мінулым годзе конкурс паглядзелі каля 163 мільёнаў чалавек. У гэтым годзе — конкурс пройдзе ўжо ў маі ў Вене — гледачоў можа быць менш: некалькі краін вырашылі байкатаваць «Еўрабачанне» з-за ўдзелу ў ім Ізраіля. Яны заклікалі адхіліць Ізраіль гэтак жа, як у 2022 годзе пасля ўварвання ва Украіну адхілілі Расію. Расія ў адказ на гэта запусціла ўласны музычны конкурс «Інтэрбачанне», у якім у 2025 годзе прынялі ўдзел 23 краіны.
З 2000‑х гадоў прадпрымаліся неаднаразовыя спробы стварыць азіяцкую версію «Еўрабачання», але ніводная з іх пакуль што не ўвянчалася поспехам.
Былы беларускі міліцыянер шукае «пародзістую прыгажуню». Называе сябе мільянерам, а сам судзіцца з былой жонкай за аліменты21
Каментары