Упершыню ў Беларусі праходзяць вучэбна-палявыя зборы для вучняў 10‑х класаў — з гэтага года яны сталі абавязковымі пасля ўключэння ў навучальную праграму. «Флагшток» вывучыў справаздачы пра пачатак збораў у раёнах Гомельскай вобласці.
У некаторых раёнах, напрыклад, у Нараўлянскім, адкрыццё збораў праходзіла пры ўдзеле старшыняў райвыканкамаў. У іншых выпадках зборы адкрывалі не толькі педагогі і чыноўнікі, але і вайскоўцы, прамаўляючы пафасныя прамовы.
У Лельчыцах на мерапрыемства запрасілі нават вакальнае трыа. У сваёй справаздачы раённыя ідэолагі не хавалі мэту заняткаў, якія абавязалі праходзіць школьнікаў — магчымы ўдзел у вайне:
«Новы час патрабуе новых герояў — людзей моцных духам, адданых сваёй Радзіме, гатовых абараняць свой дом, сваю сям’ю і сваю краіну. Наш народ ва ўсе часы славіўся мужнасцю, стойкасцю і адданасцю сваёй краіне. Нашы дзяды і прадзеды абаранялі родную зямлю ў гады Вялікай Айчыннай вайны, праяўлялі гераізм і самаадданасць дзеля міру і свабоды. Сёння гэта задача маладога пакалення».
Прадстаўнік мясцовага ваенкамата падкрэсліў ідэалагічную задачу: «На гэтых зборах будзе сфармаваны сапраўдны патрыёт Радзімы».
На фота можна ўбачыць вайскоўцаў спецназа, якія дзяжураць тут у межах «узмацнення мяжы» — яны паказалі школьнікам узбраенне.
Амаль у кожным раёне падлеткам раздалі ўніформу рознага тыпу. Калі ў Лельчыцах школьнікаў адзелі ў чырвоныя і зялёныя майкі і бейсболкі, то ў іншых раёнах, пераважна, у камуфляжную форму. У некаторых раёнах, у прыватнасці, у Жыткавіцкім, ніякай уніформы наогул не далі.
Намёты таксама амаль усюды розныя: недзе сучасныя турыстычныя, у іншых месцах — старыя савецкія, у некаторых выпадках — наогул гандлёвыя палаткі, а дзе-нідзе — пазычаныя ў вайскоўцаў.
Як распавядаў «Флагшток», дзеля правядзення збораў у многіх раёнах праводзілі тэндары на закупку вінтовак, намётаў і іншых прадметаў, але на Гомельшчыне такія закупкі абвяшчалі, у асноўным, толькі для арганізацыі харчавання.
З мясцовых бюджэтаў закупляюць процьму тавараў для правядзення збораў. Кошт адной вінтоўкі, напрыклад, — амаль 2,4 тыс. рублёў.
Процівагазы, макеты аўтаматаў і гранат, аўтаматныя ражкі, папяровыя карты — усё гэта таксама дасталі ваенрукі са старых савецкіх запасаў.
Намётавыя лагеры зладзілі на школьных стадыёнах, у некаторых месцах лагеры зрабілі перасоўнымі, а ёсць выпадкі, калі школьнікі наогул начуюць у спартзалах, а не ў намётах. Да прыкладу — у Чачэрску і Ельску. Відаць, там намёты для збораў дастаць не змаглі, і падлеткі спяць у ложках з рознымі пасцельнымі камплектамі: імаверна, кожнаму прыйшлося прыносіць свой з дому.
Каментары