У закрытай справаздачы аналітыкаў Сбербанка верагоднасць перамогі Расіі ў вайне супраць Украіны ацанілі на 7%
Хакеры з Black Mirror апублікавалі ўнутраны дакумент банка.
Аналітыкі Сбербанка ацанілі верагоднасць перамогі Расіі ў вайне супраць Украіны на 7%. Хакеры з Black Mirror апублікавалі ўнутраны дакумент банка, піша The Insider.
Хакерская групоўка Black Mirror апублікавала аналітычную запіску Сбербанка, у якой апісваюцца розныя сцэнары заканчэння вайны ва Украіне і ацэньваецца верагоднасць іх рэалізацыі. Дакумент пад назвай «Сцэнары дасягнення міру ў канфлікце Расія — Украіна» датаваны красавіком 2026 года.
Як сцвярджае Black Mirror, запіска была атрымана з перапіскі кіраўніка Сбербанка Германа Грэфа (ён выступаў адпраўніком).
Ва ўступнай частцы запіскі пералічваюцца эканамічныя цяжкасці, з якімі сутыкнулася Расія на фоне вайны (усе прыведзеныя даныя — па стане на красавік): ад дэфіцыту бюджэту (4,58 трлн расійскіх рублёў (53 млрд даляраў)) за першы квартал пры гадавым плане на 3,8 трлн расійскіх рублёў (45 млрд даляраў) і высокай ключавой стаўкі (15%), якая «душыць грамадзянскі сектар», да падзення нафтагазавых даходаў (на 45,4% — да 1,44 трлн рублёў) і вываду са строю нафтаперапрацоўчых прадпрыемстваў у выніку сістэматычных удараў УСУ (пашкоджана 10—15% нафтаперапрацоўчых магутнасцяў).
«Урад разглядае павелічэнне дэфіцыту і ваенных выдаткаў. Ваенны мультыплікатар ацэньваецца ў 1,5× — кожны рубель ваенных выдаткаў генеруе 1,5 рубля ВУП, але за кошт выцяснення грамадзянскага сектара».
У дакуменце таксама адзначаецца, што ў Расіі страчана «да 35% кампанентаў сістэм СПА», пры гэтым папаўненне ЗРК С-300/400 адбываецца павольней за страты. «Без аднаўлення купала СПА над тылавымі аб'ектамі ўдары будуць узмацняцца».
«Дэфіцыт рабочых рук на абаронных прадпрыемствах: 80—400 тысяч чалавек. Вытворчасць боепрыпасаў упершыню паказала спад у верасні 2025 года. Тры крытычныя дэфіцыты: мікраэлектроніка (без заходніх кампанентаў высокадакладная зброя даражэе ў разы), боепрыпасы (лімітны фактар — людзі, а не грошы), рухавікі (авіяцыйныя, ракетныя, карабельныя — усе перагружаныя)».
У дакуменце прыводзіцца ацэнка ваенных страт Расіі: 20—25 тысяч чалавек на месяц. «90% новых кантрактнікаў ідуць на папаўненне, а не на фармаванне новых частак», — гаворыцца ў нататцы. Аднак адзначаецца, што поўнамаштабнай мабілізацыі ў планах няма, паколькі «палітычная рызыка непрымальная».
Цяпер чытаюць
Стала вядомая асоба рабочага «Беларуськалія», які загінуў пры абрушэнні горнай пароды1
Каментары