Гэта не адліга, проста вось так працуе кадэбісцкі бюракратычны механізм.
За апошнія тыдні са спісу «тэрарыстаў», які вядзе КДБ, прыбралі 12 чалавек. Усё гэта былыя палітвязні. З іх нарэшце будуць знятыя фінансавыя абмежаванні — людзі змогуць адкрываць банкаўскія рахункі, купляць і прадаваць нерухомасць, афармляць на сябе сім-карткі.
Сярод іх Дзяніс Сырэц, Віталь Жылінскі, Яўген Чуміла, Максім Ражкоў, Сяргей Кірыенка, Аляксандр Галуза, Мікалай Галалюк, Сяргей Савіч, Дзмітрый Удалееў, Кірыл Кузняцоў, Дзмітрый Богуш і Юрый Ташкінаў.
Не варта шукаць у гэтым нейкіх палітычных паслабленняў, насамрэч КДБ проста выконвае сваю ж працэдуру — паводле пастановы, калі ў чалавека пагашаецца судзімасць па «тэрарыстычных» артыкулах, то і са спісу яго трэба выкрэсліваць.
Зараз прыйшла чарга некаторых з палітвязняў, вызваленых па памілаванні ў жніўні і верасні 2024 года. У тых з іх, каго судзілі па няцяжкіх палітычных артыкулах, судзімасць трымалася два гады.
Цяпер яны могуць хаця б абслугоўвацца ў банках.
Нагадаем, у спіс «тэрарыстаў» уключаюцца людзі, якіх арыштавалі па некаторых з крымінальных артыкулаў. У прыватнасці, гэта арт. 130 (Распальванне варожасці), арт. 293 (Масавыя беспарадкі), арт. 361 (Заклікі да шкоды нацыянальным інтарэсам Беларусі), а таксама некаторыя іншыя. Прычым для ўключэння ў спіс не трэба нават быць асуджаным — дастаткова выстаўленага абвінавачвання.
На гэты момант у беларускай частцы спісу «тэрарыстаў» 738 чалавек (у замежнай — 736 чалавек, там афганцы, іракцы, паўночнакарэйцы і іншыя прадстаўнікі тэрарыстычных арганізацый).
Па якіх артыкулах судзілі 738 беларускіх «тэрарыстаў»? (У некаторых з іх абвінавачванне адразу па некалькіх «тэрарыстычных артыкулах»).
502 чалавекі абвінавачваліся ў «распальванні варожасці» — фактычна ў напісанні крытычных каментароў.
У 260 чалавек у абвінавачванні фігураваў артыкул 361 — заклікі да дзеянняў на шкоду нацбяспецы. Гэта таксама пераважна каментатары.
95 чалавек судзілі за «акт тэрарызму» (арт. 289), 77 чалавек палічылі ўдзельнікамі «масавых беспарадкаў» (арт. 293).
Цяпер чытаюць
Цэны на кватэры ў «Мінск-Свеце» падаюць, а ў Мінску — растуць. Сумныя перспектывы для раёна?3
Каментары