Талібы купляюць у Беларусі зброю і дроны. Пасярэднічае Індыя, згоду дала Расія — Afghanistan International
Талібы купляюць у Беларусі ўзбраенне і беспілотнікі. Пра гэта паведаміў афганскі апазіцыйны тэлеканал Afghanistan International, спасылаючыся на пяць былых высокапастаўленых чыноўнікаў, сярод якіх ёсць былыя афганскія чыноўнікі ў сферы бяспекі.
Паводле іх звестак, Індыя выступае ў гэтых здзелках пасярэднікам і фінансуе іх, а Расія дала на іх згоду. Пра гэта ў эфіры расказала карэспандэнтка тэлеканала ў Вашынгтоне Самсама Сірат. Яна нагадала, што апошнімі месяцамі візітаў паміж прадстаўнікамі талібаў і Беларусі стала больш.
Крыніцы сцвярджаюць, што гэтыя кантакты пачаліся пасля візіту ў Маскву міністра абароны талібаў мулы Якуба, які адбыўся на мяжы траўня і чэрвеня. Тады ён падпісаў з Расіяй пагадненне ў сферы бяспекі. Расійскія чыноўнікі ж заяўлялі, што пагадненне датычыць рамонту расійскай тэхнікі, якая засталася ў Афганістане.
Чалавек, блізкі да талібаў у Кабуле, таксама пацвердзіў тэлеканалу, што бакі дамовіліся і што гэта адбываецца па ўказанні Расіі і пры яе каардынацыі.
Паводле Afghanistan International, талібы хочуць мець дроны і ўзбраенне, каб узмацніць сваю абарону ад Пакістана: апошнім часам адносіны паміж краінамі абвастрыліся. Карэспандэнтка падкрэслівае, што Беларусь «ні ў якім разе» не прадала б талібам вайсковую тэхніку, а тым больш дроны, без узгаднення з Расіяй.
Пры гэтым Расія — саюзніца Пакістана, і, на думку журналісткі, наўрад ці гатовая памяняць Пакістан на талібаў. Калі ў Пакістане адбываюцца напады і Ісламабад абвінавачвае ў іх групоўкі, якія базуюцца ў Афганістане пад апекай талібаў, Масква асуджае гэтыя напады і заклікае да сумеснай барацьбы з тэрарызмам. А вось пакістанскія ўдары па Афганістане Расея не асудзіла ні разу.
Тэлеканал нагадвае, што падобная схема ўжо дзейнічала пры ранейшым урадзе Афганістана. Паводле былога высокапастаўленага чыноўніка ў сферы бяспекі з урада Ашрафа Гані, тады Індыя купляла ў Беларусі верталёты для афганскага ўрада. Акрамя таго, яна рамантавала частку ўласнай тэхнікі з дапамогай беларускіх магутнасцяў і перадавала яе Кабулу. Паводле крыніцы, цяпер талібы хочуць паўтарыць тую ж схему праз Індыю.
Самсама Сірат таксама адзначае, што Індыя — адзіная краіна, якая адкрыта падтрымлівае талібаў у супрацьстаянні з Пакістанам. Нью-Дэлі асуджае пакістанскія ўдары па Афганістане як парушэнне яго суверэнітэту і неаднойчы казаў пра гэта на міжнародных сустрэчах. Журналістка нагадвае, што былы ўрад меў міжнародную легітымнасць дзякуючы падтрымцы ЗША і НАТА. Талібы ж, паводле дакументаў Рады Бяспекі ААН, звязаныя з тэрарыстычнымі групоўкамі, таму краіны, якія пастаўляюць ім зброю, бяруць на сябе большую адказнасць.
Апошнім часам Мінск актыўна развівае адносіны з талібамі. У жніўні ў Беларусь на пяць дзён прыязджала дэлегацыя з 13‑ці чалавек на чале з выканаўцам абавязкаў міністра сельскай гаспадаркі талібаў Атаўлой Амары. Яна ўдзельнічала ў другім пасяджэнні беларуска-афганскай камісіі па гандлёва-эканамічным супрацоўніцтве. Паводле прэс-сакратара талібаў Забіхулы Маджахіда, талібы ўхвалілі беларускага пасла па сумяшчальніцтве. Служба знешняй выведкі Украіны заявіла, што Мінск апусціў сваю дыпламатыю «да ўзроўню тэрарыстаў».
Каментары