Затрымалі Тхара — кілера з банды Марозава
Ён хаваўся пад Тулай, у Расіі.
Прафесійны кілер па мянушцы Тхор, што хаваўся ад беларускага правасуддзя, затрыманы ў Тульскай вобласці Расіі. Яго ўзялі на адной з баз адпачынку ў Алексінскім раёне Тульскай вобласці.
На след ўцекача міліцыя выйшла пасля звычайнай пашпартнай праверкі: яго пашпарт быў падробны. Прабіўшы дадзеныя па ўсіх баз МУС Расіі і міжнароднага вышуку, міліцыя высветліла, што мужчына ўжо пяць гадоў лічыцца ў вышуку за асабліва цяжкія злачынствы, здзейсненыя на тэрыторыі Беларусі.
Гаворка ідзе пра падзеі 1990-х, калі ў Беларусі арудавала Гомельская арганізаваная злачынная групоўка. 1 снежня 2006 г. Вярхоўны суд Беларусі прысудзіў трох найбольш актыўных членаў банды — Сяргея Марозава, Валерыя Гарбатага і Ігара Данчанку — да найвышэйшай меры пакарання (расстрэлу). Яшчэ 23 бандыты атрымалі ад 2 да 20 гадоў пазбаўлення волі. Іх прызналі вінаватымі ў здзяйсненні серыі наўмысных забойстваў, замахах на здзяйсненне наўмысных забойстваў, нападах ў складзе банды і іншых злачынствах. Яшчэ некалькіх бандытаў, у тым ліку непасрэднага выканаўцу забойстваў — кілера Тхара, абвясцілі ў вышук.
Зараз Тхор сядзіць у адзіночнай камеры Тульскага следчага ізалятара, змяшчаць да яго суседзяў, як адзначае прэс-служба абласнога УУС, небяспечна з-за дзёрзкіх паводзінаў і запальчывага характару. Вырашаецца пытанне аб яго экстрадыцыі ў Беларусь.
Каментары