У высылку?
У высылку?
7 лістапада Беларусь мусіць пакінуць ксёндз Юры Барок. Апошнім часам ён служыў у Глыбокім.
Ксяндза Барка адпраўляюць на душпастырскую працу ў Ізраіль. Такое рашэнне ўлетку прыняў віцебскі біскуп Уладзіслаў Блін.
Спачатку меркавалася, што ксёндз будзе працаваць з выхадцамі з постсавецкай прасторы. Аднак, выглядае, што ён трапіць у габрэйскую каталіцкую грамаду. Праблема заключаецца ў тым, што ні габрэйскай, ні арабскай моваў Барок не ведае.
Сам святар прызнаецца, што не хоча пакідаць Беларусі і спадзяецца ў хуткім часе вярнуцца назад на Радзіму. Брат Юрыя Вячаслаў, дарэчы, таксама святарствуе, у Расонах.
Юры Барок цікавы тым, што не баіцца выказваць сваю грамадзянскую пазіцыю. Ён аспрэчвае той тэзіс, што хрысціянін не можа ўдзельнічаць у палітычным жыцці.Удзельнічаў у стварэнні Беларускай хрысціянскай дэмакратыі.
Такая пазіцыя выклікала незадавальненне дзяржаўных уладаў.
І вось
Паводле звестак «Нашай Нівы», з высылкай ксяндза Барка ў Ізраіль супала адна пікантная гісторыя, у якой быў замешаны клірык Віцебскай дыяцэзіі, паляк па нацыянальнасці. Справу тую было вырашана замяць, клірык вольна выехаў у Польшчу. І — амаль адначасова — дыяцэзія страціць «нязручнага» святара.
Нешта падобнае ўжо здаралася з айцом Андрэем Сідаровічам. Аршанскі святар удзельнічаў у Плошчы ў 2006 годзе. Быў арыштаваны пры разгоне намётавага мястэчка, атрымаў 10 сутак у Жодзінскім СІЗА. Амаль адразу пасля гэтага малады святар быў пераведзены з вялікай Воршы у маленькую вёску Росіца, дзе няма каму прапаведаваць. Тады, паводле нашых звестак, тое адбылося таксама пасля візіту супрацоўнікаў спецслужб да каталіцкага біскупа.
Чытайце яшчэ: Наш чалавек у Зымбабвэ.
Каментары