«Газпром»: Зніжэння цаны на газ для Беларусі ў 2011 годзе не будзе

Дамоўленасцяў аб зніжэнні цаны на газ для Беларусі ў 2011 годзе на гэты момант няма, рэаліі Адзінай эканамічнай прасторы (АЭП) будуць улічаны ў кантрактах на 2012–2013 гады.

Аб гэтым паведаміў у эфіры радыёстанцыі «Рэха Масквы» афіцыйны прадстаўнік «Газпрома» Сяргей Купрыянаў.

«Мы сваім суразмоўцам у Беларусі кажам, што ёсць кантракт і згодна з ім мы будзем працаваць. Такіх дамоўленасцяў няма», — сказаў Купрыянаў, адказваючы на пытанне, ці ёсць дамоўленасці аб зніжэнні цаны газу для Беларусі ў наступным годзе.

У той жа час, перадае словы Купрыянава РІА Новости, ён падкрэсліў, што наяўнасць кантракту дазваляе не чакаць праблем з пастаўкамі праз Беларусь у Новы год.

«Праблем з пераходам з 31 снежня на 1 студзеня мы не чакаем», — адзначыў прадстаўнік «Газпрома».

Ён таксама дадаў, што ў новых кантрактах плануецца ўлічыць стварэнне АЭП.

«Гаворка ідзе не аб 2011-м, а аб 2012 і 2013 гадах. Ёсць дамоўленасці, што ў новых кантрактах мы павінны ўлічыць рэаліі Адзінай эканамічнай прасторы», — сказаў Купрыянаў.

Паводле яго слоў, у кантрактах таксама будзе ўлічана тое, што ў Расіі адкладваецца пераход на роўнадаходныя цэны на газ, тады як пры падпісанні дзейнага кантракту з Беларуссю гэты пераход быў запланаваны на 2011 год.

Кантракт паміж «Газпромам» і «Белтрансгазам» на 2007–2011 гады прадугледжвае, што ў 2008–2010 гадах для Беларусі дзейнічаюць паніжальныя каэфіцыенты да цаны на газ, а з 2011 гады Беларусь павінна выйсці на ўзровень цэн, які забяспечвае роўную даходнасць з пастаўкамі ў Еўропу.

Як адзначаў намеснік старшыні праўлення «Газпрома» Валерый Голубеў, у 2011 годзе паніжальны каэфіцыент будзе роўны адзінцы і цана на газ для Беларусі складзе 230 долараў за тысячу кубаметраў. У 2010 годзе сярэднегадавая цана на расійскі газ для Беларусі складае 187 долараў.

Віцэ-прэм’ер урада Беларусі Андрэй Кабякоў на гэтым тыдні заявіў, што Мінск і Масква вядуць «складаныя» перамовы па цане на газ у 2011 годзе. Ён не ўдакладніў пазіцыю беларускага боку, нагадаўшы толькі, што Расія ўзяла на сябе абавязацельствы па выхадзе на роўнадаходнасць унутраных і знешніх цэн на газ да 2015 года. Гэта прадугледжана дамовай аб правілах доступу да паслуг натуральных манаполій, якая падпісана ў рамках фарміравання АЭП. Пры гэтым траекторыя пераходу на роўнадаходныя цэны ў 2012–2014 гадах можа быць рознай, адзначыў Кабякоў.

Генеральны дырэктар ААТ «Белтрансгаз» Уладзімір Маёраў паведамляў, што Беларусь і Расія плануюць падпісаць дадатковае пагадненне да базавага кантракту на пастаўку газу ў 2011 годзе.

• 0
• 0
• 0
• 0
• 0
• 0
• 0
• 0