Дадатковыя захады будуць скіраваныя супраць прадпрыемстваў, якія фінансава падтрымліваюць лукашэнкаўцаў: «Белнафтахіма», «Трайпла», «Белтэхэкспарта», «Беларуськалія».
Паводле інфармацыі сайта EUObserver, дыпламаты Еўрасаюза рыхтуюць дадатковыя санкцыі супраць рэжыму Аляксандра Лукашэнкі.
Сайт піша, што гэтыя дадатковыя захады будуць накіраваныя супраць прадпрыемстваў, якія фінансава падтрымліваюць беларускую наменклатуру, а менавіта — супраць «Белнафтахіма», «Трайпла», «Белтэхэкспарта», «Беларуськалія».
EUObserver піша, што новыя санкцыі плануюцца так,
каб адчувальна закрануць дзяржаўны бюджэт ды прыватныя даходы Лукашэнкі і ягонага атачэння, але пазбегчы сур’ёзнай шкоды для эканомікі краіны ды для кампаній ЕС у Латвіі, Літве, Нідэрландах і Польшчы.
Пакет санкцый, дадае сайт EUObserver, распрацоўваецца ў амбасадах ЕС у Мінску і дыпламатамі сярэдняга ўзроўню ў Брусэлі. Верагодна, што новыя санкцыі могуць быць зацверджаныя на пасяджэнні міністраў замежных справаў ЕС у красавіку.
Амбасада Венгрыі ў Мінску, якая прадстаўляе інтарэсы ЕС у Беларусі, адмовілася каментаваць гэтую інфармацыю, паведамляе БелаПАН. «Я думаю, такога рашэння ў Брусэлі не было», — сказаў агенцтву пасол Фэрэнц Контра.
Каментары