Натуральны прырост насельніцтва ў Мінску за першае паўгоддзе знізіўся ў тры разы
Колькасць насельніцтва Мінска на 1 ліпеня 2011 года склала 1868 тыс. чалавек і ў параўнанні з пачаткам года павялічылася на 3,9 тыс. чалавек,паведамляе галоўнае статыстычнае упраўленне Мінска.
Паводле звестак уліку, за студзень-чэрвень у сталіцы нарадзіліся 9732 дзіцяці, што на 5,5% менш, чым за адпаведны перыяд мінулага года. Зніжэнне колькасці нованароджаных зафіксавана ва ўсіх раёнах Мінска, акрамя Фрунзенскага, дзе колькасць народжаных захавалася на ўзроўні студзеня-чэрвеня 2010 года.
Агульны каэфіцыент нараджальнасці ў цэлым па горадзе знізіўся і склаў на 1 тыс. чалавек насельніцтва 10,5 народжаных супраць 11,2 за аналагічны перыяд мінулага года.
За І паўгоддзе гэтага года ў Мінску памерлі 9174 чалавекі. Агульны каэфіцыент смяротнасці склаў 9,9 чалавека на 1 тыс. чалавек насельніцтва.
Натуральны прырост насельніцтва сталіцы (перавышэнне колькасці народжаных над колькасцю памерлых) імкліва скарачаецца.У параўнанні са студзенем-чэрвенем мінулага года ён знізіўся ў 2,6 раза. Натуральны прырост быў адзначаны ў пяці раёнах горада: Фрунзенскім (507 чалавек), Маскоўскім (409 чалавек), Кастрычніцкім (132 чалавекі), Ленінскім (95 чалавек), Першамайскім (14 чалавек). У астатніх раёнах сталіцы склалася натуральнае змяншэнне насельніцтва.
У параўнанні з І паўгоддзем мінулага года колькасць памерлых у цэлым па горадзе ўзрасла на 3,3 працэнта. Рост колькасці памерлых адзначаны ва ўсіх раёнах, за выключэннем Ленінскага і Савецкага. Асноўнай прычынай смяротнасці па-ранейшаму застаюцца хваробы сістэмы кровазвароту. Ад іх памерлі 5213 чалавек, або 56,8 працэнта ад агульнай колькасці памерлых. Ад новаўтварэнняў памерлі 1726 чалавек, або 18,8 працэнта. Ад няшчасных выпадкаў, атручэнняў і траўмаў і іншых знешніх уздзеянняў загінуў 841 чалавек, або 9,2 працэнта.
За студзень-чэрвень у параўнанні з аналагічным перыядам мінулага года колькасць зарэгістраваных шлюбаў узрасла на 1,4 працэнта, колькасць разводаў знізілася на 0,5 працэнта. Усяго ж за І паўгоддзе бягучага года зарэгістравана 6338 шлюбаў і 3760 разводаў. У сталіцы палепшыліся суадносіны шлюбаў і разводаў: у I паўгоддзі 2011-га на 1 тыс. шлюбаў прыпадала 593 разводы, у I паўгоддзі 2010-га - 604.
Цяпер чытаюць
Што азначае з’яўленне выхадцаў з Беларусі ў расійскім спецпадраздзяленні для асабліва важных аперацый і тайных забойстваў?20
Каментары