20 верасня быў затрыманы бацька пацярпелай у часе выбуху ў метро, які хадайнічаў пра адмену смяротнага пакарання.
У аўторак быў затрыманы бацька Інэсы Крутой, пацярпелай у часе выбуху ў метро. У першы дзень суда па справе тэрактаў Аляксандр Круты хадайнічаў пра адмену смяротнага пакарання. Яго абвінавацілі ў хуліганстве.
Аляксандр Круты — адзін з асуджаных за абразу Лукашэнкі. Крымінальную справу паводле арт. 368 КК распачалі ў маі 2003 г. На той момант ён жыў у Нясвіжы, займаўся праваабарончай дзейнасцю. Пасля завядзення справы яго адпусцілі пад распіску. Ён з’ехаў у Мінск, дзе знаходзіўся да восені 2007 года. Ён быў ізноў затрыманы і змешчаны ў жодзінскае СІЗА.
24 студзеня 2008 года суд Нясвіжскага раёна прызнаў Аляксандра Крутога вінаватым у публічнай абразе Лукашэнкі. Але з-за адсутнасці вялікай пагрозы для грамадства яго вызвалілі ад адказнасці і спынілі справу. Аднак, дамоў ён патрапіў не адразу.
У часе следства праводзілася судова-медыцынская экспертыза, якая выявіла ў Крутога паранаідальную шызафрэнію. Замест вызвалення яго накіравалі на лячэнне ў рэспубліканскі псіхіятрычны шпіталь у Навінках.
У лютым 2008 года судовая калегія па крымінальных справах Мінскага абласнога суда адмяніла пастанову суда Нясвіжскага раёна і адмяніла вытворчасць па справе Крутога.
У свой час Аляксандр Круты, фізік па адукацыі, працаваў на Міністэрства абароны, потым стаў прадпрымальнікам.
«Гэта бескампрамісны і валявы чалавек, меў вялікі архіў дакументаў, бо не прапускаў ніводнага выпадку парушэння правоў сваіх землякоў» — характарызаваў у 2007 годзе Крутога грамадскі актывіст з Нясвіжа Алесь Язвінскі.
Цяпер чытаюць
Пальчыс: Я супраць дапамогі тым палітвязням, хто ў зняволенні працаваў на адміністрацыю5
Каментары