На сайце catholic.by апублікавана праграма міжнароднай канферэнцыі, прысвечанай праваслаўна-каталіцкаму дыялогу, якая адбудзецца 13–15 лістапада 2011 г.
На гэты раз удзельнікі канферэнцыі будуць абамяркоўваць пытанне «Праваслаўна-каталіцкі дыялог: хрысціянскія этычныя каштоўнасці як уклад у сацыяльнае жыццё Еўропы». Гаворка, вядома, пойдзе перш-наперш пра такія каштоўнасці, як чалавечае жыццё і сям’я. Нездарма ж даклад мітрапаліта Тадэвуша Кандрусевіча мае загаловак «Хрысціяне перад абліччам выклікаў постмадэрнісцкай ідэалогіі».
Канферэнцыя як канферэнцыя, калі б не тое, што яна адбываецца з ведама (і, напэўна, блаславення) Патрыярха Маскоўскага і біскупа Рыма. Расійскі праваслаўны бок на гэтай канферэнцыі будзе ўзначальваць экзарх Філарэт, а каталіцкі бок будзе прадстаўляць старшыня Папскай рады спрыяння хрысціянскаму адзінству кардынал Курт Кох.
Хоць гэтае даволі прадстаўнічае мерапрыемства пройдзе ў сталіцы Беларусі, беларускай мове на ёй месца няма. Як паведамлена ў праграме, рабочыя мовы канферэнцыі – расейская, англійская і нямецкая (апошняя, мусіць, дзеля задавальнення нацыянальных пачуццяў кардынала), а ў чатырох секцыях і наагул будзе гучаць толькі адна — вялікая і магутная.
Цікава было б даведацца, хто не пусціў нашу мову на канферэнцыю – РПЦ ці РКЦ? Ці абедзве Царквы ў добрай згодзе, так сказаць, дзеля хрысціянскага адзінства?
Тут міжволі ўспомніш прыказку ўкраінскіх праваслаўных аўтакефалістаў: Масква нам не мама, а Рым – не тата. Мачаха ды айчым. Мусіць, тая наша беларуская доля.
Каментары