Паводле звестак ДПА «Белэнерга», 28 лістапада з-за моцнага ветру ў Беларусі быў абясточаны 1.271 населены пункт. Электразабеспячэнне спажыўцоў адноўлена, паведаміла прэс-служба МНС.
Згодна з аператыўнымі звесткамі з-за парываў ветру (да 24 м/с) пашкоджаны дахі 84 жылых дамоў: у Брэсцкай вобласці — 63, Гродзенскай — 19, Мінскай — 2. Адноўлены дахі на 5 дамах. Таксама пашкоджаны 13 аб’ектаў сацкультбыту (адноўлены 3), 10 вытворчых (не адноўлены) і 412 сельскагаспадарчых будынкаў (адноўлены 12). Аварыйнымі брыгадамі вядуцца аднаўленчыя работы.
Як паведаміў Рэспубліканскі гідраметэацэнтр, 28 лістапада Беларусь знаходзілася пад уплывам актыўных атмасферных франтоў ад цыклона з цэнтрам над Белым морам. Вецер быў паўднёва-заходні з пераходам на паўночна-заходні моцны парывісты, у асобных раёнах вельмі моцны парывісты.
29 лістапада рэспубліка апынецца ў тылавой частцы цыклона, толькі днём па захадзе надвор’е будзе вызначаць вобласць павышанага атмасфернага ціску. Вецер заходні, паўночна-заходні парывісты, ноччу па ўсходняй палове моцны парывісты. У сераду, 30 лістапада, тэрыторыя краіны застанецца пад уплывам вобласці павышанага атмасфернага ціску. Будзе пераважна без ападкаў. Па паўночна-ўсходняй палове захаваецца моцны парывісты вецер.
Каментары