Паводле звестак БелаПАН, сістэмы «Тор», якія Беларусь закупіла ў Расіі, паступяць на ўзбраенне 120-й зенітнай ракетнай брыгады. Яе штаб знаходзіцца ў Баранавічах. Цяпер злучэнне ўзброена зенітнымі ракетнымі комплексамі «Бук». «Торы» ў яго склад будуць уведзены асобнай батарэяй. Плануецца, што новыя зенітныя ракетныя сістэмы паступяць у Беларусь у другой палове снежня.
Прэс-служба Міністэрства абароны Беларусі гэтую інфармацыю не каментуе.
Аб тым, што новыя сродкі СПА для Узброеных сіл Беларусі «ўжо знаходзяцца ў дарозе», заявіў на прэс-канферэнцыі 7 снежня начальнік Генеральнага штаба УС генерал-маёр Пётр Ціханоўскі. Паводле звестак БелаПАН, складальныя часткі новай сістэмы будуць дастаўлены ў Беларусь з некалькіх пунктаў Расіі.
21 лютага 2011 года міністр абароны генерал-лейтэнант Юрый Жадобін паведаміў, што Беларусь закупіць у Расіі дывізіён зенітных ракетных сістэм новага пакалення «Тор-М2Э» і першая батарэя паступіць ужо сёлета. Паводле яго слоў, кантракт, які быў заключаны на вельмі выгадных для краіны ўмовах, разлічаны на тры гады.
Як паведаміла 1 ліпеня 2011 года «Красная звезда» са спасылкай на намесніка дырэктара Федэральнай службы па ваенна-тэхнічным супрацоўніцтве РФ Канстанціна Біруліна, кантракт быў падпісаны ў 2010 годзе. «Пастаўка ажыццяўляецца па льготных цэнах, гэта значыць па тых жа цэнах, па якіх закупляе гэтыя сістэмы Мінабароны Расіі», — сказаў ён.
ЗРС «Тор-М2Э» з’яўляецца прадстаўніком новага пакалення баявых сродкаў СПА малой далёкасці класа «Тор». Вызначаецца павышанай эфектыўнасцю адбіцця масіраваных налётаў сучасных сродкаў паветранага нападу ва ўмовах агнявога і радыёэлектроннага процідзеяння. У канцэрне СПА «Алмаз-Антэй» — распрацоўшчыку сістэмы — заяўляюць, што «Тор-М2Э» — гэта эфектыўны сродак паражэння самалётаў, верталётаў, аэрадынамічных беспілотных лятальных апаратаў, кіраваных ракет і іншых элементаў высокадакладнай зброі, якія лятаюць на сярэдніх, малых і гранічна малых вышынях у складанай паветранай і з перашкодамі абстаноўцы.
Зенітная ракетная сістэма «Тор-М2Э» на колавым шасі ствараецца ў кааперацыі з Мінскім заводам колавых цягачоў.
У складзе «Тор-М2Э» баявая машына на колавым або гусенічным шасі; зенітны ракетны модуль з чатырма зенітнымі кіраванымі ракетамі; транспартна-заражальная машына; транспартная машына; машыны тэхнічнага абслугоўвання; машына групавога камплекта запасных частак і прылад; камплект такелажнага абсталявання; трэнажор аператараў баявых машын; майстэрня тэхнічнага абслугоўвання.
Каментары