Працэс закрыты. Справу разглядае судзьдзя Вярхоўнага суду.
Былы старшы лейтэнант, супрацоўнік дэпартамэнту аховы МУС, 37‑гадовы Аляксандар Сяргейчык абвінавачваецца ў дваццаці двух злачынствах — сярод іх дванаццаць забойстваў. Працэс закрыты, справу разглядае судзьдзя Вярхоўнага Суду Беларусі.
Сёньня побач з будынкам абласнога суду ў Горадні зь дзявятай раніцы быў перакрыты рух аўтамабіляў. Суд ахоўвалі ўзмоцненыя сілы міліцыі, у будынак прапускалі толькі тых, хто паказваў позвы. Прэсу (нават дзяржаўную) у залю суду не дапусьцілі.
Аляксандар Сяргейчык быў арыштаваны на пачатку году ў Горадні. Сьледзтва мела неабвержныя доказы ягонай датычнасьці да забойства дзяўчыны ў мікрараёне Дзевятоўка ў Горадні.
У выніку сьледчых дзеяньняў раскрылі яшчэ адно забойства зь ягоным удзелам, а далейшая праверка Сяргейчыка выявіла нечаканыя вынікі: ён забіў адзінаццаць маладых жанчын і аднаго мужчыну. Гэтыя злачынствы былі зьдзейсьненыя ў 2000—2005 гадах у Горадні й Гарадзенскім раёне. Целы забітых знаходзілі ў ваколіцах Горадні і ў Нёмане.
Мне ўдалося адшукаць чалавека, які працаваў разам зь Сяргейчыкам у дэпартамэнце аховы МУС. Вось што згадвае Рышард Дамінюк:
Дамінюк: «Не магу сказаць, каб ён тады неяк дрэнна сябе паводзіў, але нейкая антыпатыя да яго была. Ён неяк стараўся трымацца ўбаку, а я зь ім не імкнуўся навязваць кантактаў».
Службу ў дэпартамэнце аховы Сяргейчык пачынаў сяржантам. Пазьней скончыў на «выдатна» акадэмію МУС і даслужыўся да камандзіра роты ў званьні старшага лейтэнанта. Ён жанаты й мае дваіх дзяцей.
Рышард Дамінюк распавядае, што ў той час у дэпартамэнт аховы траплялі не найлепшыя міліцыянты:
Дамінюк: «Калі я прыйшоў працаваць у дэпартамэнт аховы — то гэта наагул, лічылася, адна з апошніх службаў, куды, як правіла, зьбіралі ўсіх парушальнікаў дысцыпліны ці тых, хто ня вельмі зарэкамэндаваў сябе на службе».
Апроч забойстваў Аляксандра Сяргейчыка вінавацяць яшчэ ў дзесяці злачынствах: крадзеж і захоўваньне зброі, крадзеж аўтамабіляў ды іншае. Крымінальная справа налічвае трыццаць восем тамоў, у суд выклікалі каля ста сьведкаў.
Сьледзтва праводзілі супрацоўнікі рэспубліканскай пракуратуры. Комплексная псыхалягічна‑псыхіятрычная экспэртыза прызнала абвінавачанага здаровым.
Цяпер чытаюць
Cцяпан Латыпаў трэці раз спрабаваў здзейсніць суіцыд у турме3
Cцяпан Латыпаў трэці раз спрабаваў здзейсніць суіцыд у турме
Часам нечаканая гісторыя беларускіх гімнаў: «Мы выйдзем шчыльнымі радамі», «Пагоня», «Жыве Беларусь», «Радзіма мая дарагая», «Магутны Божа» (з ВІДЭА)1313
Каментары