Кучынскі: Візіт Ціханоўскай ва Украіну адбудзецца ў хуткім часе
Ідзе абмеркаванне дат і фармату
Візіт Святланы Ціханоўскай ва Украіну адбудзецца «ў хуткім часе», заявіў «Позірку» яе дарадца па дыпламатычных пытаннях Дзяніс Кучынскі.
На пытанне, чаму пакуль не адбыўся візіт, які, як шырока меркавалася, меўся прыпасці на Дзень Волі (25 сакавіка), суразмоўца адзначыў, што «не было нейкай зафіксаванай даты».
«Ідзе працэс вызначэння календароў мерапрыемстваў, дат візіту. Плюс гэта Украіна, мы мусім паведаміць [пра візіт], калі будзе бяспечна. Гэты візіт адбудзецца ў хуткім часе. Гэта не быў перанос візіту — ідзе абмеркаванне дат і фармату», — сказаў ён.
Кажучы пра тое, якая частка парадку дня будучага візіту ўжо ўзгодненая, Кучынскі адказаў, што яшчэ «падчас сустрэчы з прэзідэнтам Украіны Уладзімірам]Зяленскім» сёлета ў студзені ў Вільні абмяркоўваўся «адзін з вельмі важных элементаў — прызначэнне спецыяльнага пасланніка па працы з дэмакратычнай Беларуссю, беларускімі дэмсіламі».
«Я думаю, што гэта будзе адным з найбольш важных элементаў, — заявіў дарадца палітыка. — Каб быў чалавек, прафесіянал, які будзе працаваць з беларускімі дэмсіламі, а таксама іншымі нашымі замежнымі партнёрамі. Бо такія спецпрадсаўнікі ўжо ёсць амаль у 20 краінах».
«Зараз мы размаўляем з нашымі партнёрамі, працуе наша місія [ва Украіне] і яе кіраўніца Святлана Шаціліна, збіраем максімальна інфармацыю ад беларусаў ва Украіне. Галоўнае пытанне, з якім мы рыхтуемся да гэтага візіту, збіраемся прыехаць у Кіеў, — як мы можам больш дапамагчы Украіне. Таму што ад Украіны ў тым ліку залежыць і будучыня Беларусі, і будучыня Літвы, Польшы, усяго рэгіёна. Таму вельмі вялікая задача, безумоўна, як мага больш дапамагаць Украіне. На кожнай міжнароднай сустрэчы Святлана Ціханоўская падкрэслівае важнасць максімальнай падтрымкі Украіны», — падкрэсліў суразмоўца.
У інтэрв’ю «Еўрапейскай праўдзе», апублікаваным 20 сакавіка, Ціханоўская выказала спадзеў на тое, што ў яе атрымаецца сустрэць ва Украіне Дзень Волі — народнае нацыянальнае свята беларусаў, якое рэжым не вітае». Раней яна меркавала, што візіт можа адбыцца напрыканцы лютага — на пачатку сакавіка.
Цяпер чытаюць
«Дык дадому забяры алкаша абасцанага і выходжвай». Малады загадчык аддзялення бальніцы не стрымлівае сябе ў выразах у сацсетках18
Каментары
Як не было зафіксаванай даты? Была. Усе смі пісалі канкрэтную дату: 24 лютага. Потым канкрэтную дату: 25 сакавіка.
Ад офіса абвяржэнняў не паступала за гэтыя 2 ці 3 месяцы.