У Беларусі здымаюцца ўсе абмежаванні на вываз тавараў фізасобамі
Адпаведную пастанову прыняў Саўмін.
У Беларусі 15 лютага адмяняюцца абмежаванні і забароны на вываз фізічнымі асобамі спажывецкіх тавараў за мяжу, паведамілі ўпрэс-службе Дзяржаўнага мытнага камітэта.
Пастановай Саўміна ад 6 лютага 2012 года № 124 прызнана, што страціла сілу пастанова ўрада ад 11 чэрвеня 2011 года № 755 «Аб некаторых мерах па абароне спажывецкага рынку».
Чэрвеньскай пастановай быў зацверджаны пералік тавараў і нормы іх вывазу фізічнымі асобамі, пры перавышэнні якіх падлягаў выплаце спецыяльны збор.Таксама быў прыняты пералік тавараў, часова забароненых да вывазу фізасобамі. Зараз усе абмежаванні і забароны з 00.00 15 лютага 2012 года здымаюцца, удакладнілі ў ДМК.
Нагадаем, згодна з пастановай № 755, у пераліку часова забароненых да вывазу тавараў значыліся бытавыя халадзільнікі і маразільнікі вытворчасці ЗАТ «Атлант»; газавыя пліты СП «Брэстгазаапарат»; цэмент вытворчасці ААТ «Краснасельскбудматэрыялы», РУП «Беларускі цэментны завод» і «Крычаўцэментнашыфер», сінтэтычныя мыйныя сродкі ААТ «Бархім», а таксама крупы і макаронныя вырабы незалежна ад вытворцы.
У пералік тавараў, вываз якіх нармаваны, былі ўключаны: свініна і мяса птушкі, цукар, мука, сычужныя сыры (можна было вывозіць не больш як 2 кг); масла сметанковае (1 кг); тытунёвыя вырабы беларускай вытворчасці (2 пачкі); мясныя і малочныя кансервы (5 бляшанак). Пры перавышэнні гэтых норм фізасобы абавязаны былі выплачваць спецыяльны збор, памер якога складаў двухразовую сярэднюю цану тавару.
Забарона і абмежаванні не тычыліся вывазу згаданых тавараў у краіны Мытнага саюза — Расію і Казахстан.
Варта зазначыць, што з чэрвеня мінулага года ў Беларусі таксама дзейнічаюць абмежаванні на вываз фізасобамі аўтамабільнага паліва. Паводле звестак ДМК, на яго абмежаванні застаюцца. Кантроль за вывазам паліва ўстаноўлены пастановай Саўміна № 753.
Пытанне ўвядзення вышэйпералічаных абмежавальных мер абмяркоўвалася 10 чэрвеня на сустрэчы Аляксандра Лукашэнкі з дзяржсакратаром Савета бяспекі Леанідам Мальцавым.
Лукашэнка тады звярнуў увагу на праблему «актыўнага вывазу ў сумежныя краіны сацыяльна значных тавараў, у тым ліку аўтмабільнага паліва, прадуктаў харчавання, на якія цэны ў Беларусі значна ніжэйшыя, чым у суседзяў».
Цяпер чытаюць
«Мы даём Штатам тое, што яны хочуць». Расійскі канал апублікаваў відэа, якое называюць запісам Рыжанкова схаванай камерай у машыне15
Каментары