Намеснік гендырэктара МАЗ: Асноўная задача — пачаць карэнную рэканструкцыю вытворчасці 4

Сёлета адна з асноўных задач Мінскага аўтамабільнага завода — пачаць карэнную рэканструкцыю вытворчасці, паведаміў першы намеснік гендырэктара МАЗ Анатоль Дзядкоў 6 сакавіка на прэс-канферэнцыі ў Мінску.

Паводле яго слоў, у прыватнасці, пачынаецца рэканструкцыя ліцейнага завода і прэсава-кузаўнога завода. «Рэканструкцыя „ліцейкі“ жыццёва неабходная. Па нашых разліках, з дапамогай рэканструкцыі нам удасца скараціць аб’ём спажывання электраэнергіі на 25–30%, у 80–90 разоў паменшыць аб’ём выкідаў у навакольнае асяроддзе», — падкрэсліў намеснік гендырэктара.

Што да затрат на рэканструкцыю, то, паводле слоў Дзядкова, дакладныя лічбы пакуль невядомыя: «Пройдзе конкурс, мы правядзем таргі, і ўжо толькі тады будзем ведаць канкрэтную суму.

Па папярэдніх ацэнках, яна складзе каля 280–300 мільёнаў долараў».

Таксама Дзядкоў адзначыў, што ў 2012 годзе ў параўнанні з папярэднім запланавана павелічэнне экспарту прадукцыі завода на 12%. «У той жа час мы бачым, што тыя напрацоўкі, якія ў нас ёсць, дазволяць рэальна мець больш чым 12%», — падсумаваў ён.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ