Міліцыя абмяжоўвае кантакты з сям’ёй расстралянага Уладзіслава Кавалёва
24 красавіка да Кавалёвых прыязджалі супрацоўнікі расійскага тэлебачання. За дзве гадзіны да іх візіту ў двары з'явілася машына з міліцыянтамі.
Любоў Кавалёва, маці другога расстралянага — Уладзіслава Кавалёва, паведаміла: «Мы чакалі тэлежурналістаў, яны рыхтуюць праграму ў серыі "Чалавек і закон". Але толькі яны пад’ехалі на таксі, як з "жыгулёнка" выскачылі міліцыянер і супрацоўнік АМАПа, кінуліся да здымачнай групы, не пускалі іх у дзверы пад’езду. Я спусцілася да ўваходу, запытала, чаму да мяне не пускаюць людзей. Тады журналістаў упусцілі ў пад’езд, але перапісаўшы іхныя асабістыя звесткі».
Любоў Кавалёва кажа, што міліцыянеры ёй тлумачылі, нібыта ад суседзяў паступілі скаргі ў службу «102» на нейкіх журналістаў, якія шукаюць «лабараторыю» Дзмітрыя Канавалава. Гэта другі абвінавачаны ў падрыхтоўцы і здзяйсненні выбуху 11 красавіка мінулага года, якога таксама расстралялі паводле выраку Вярхоўнага суда.
Аднак сям’я Канавалавых жыве ў суседнім доме — там і была, паводле следства, «лабараторыя тэрарыстаў». Бацькоў расстралянага Дзмітрыя Канавалава пасля выбуху ў мінскім метро ўзялі пад ахову і паўсюль суправаджаюць людзі ў цывільным.
Любоў Кавалёва ад такой аховы адмовілася яшчэ год таму — яна кажа, што ёй ніхто і нічога не пагражае. Яна не верыць у вінаватасць сына, лічыць, што справа «віцебскіх тэрарыстаў» сфабрыкаваная і выступае супраць смяротнага пакарання.
Цяпер чытаюць
Начальнік міліцыі Брагіна страляў у сваю жонку. Яна цудам выжыла9
Каментары