Засада на генэрала Грыба
Чалавека, што падпісаў дзейную Канстытуцыю, за шэсьце ў ейны гонар аштрафавалі і фактычна пазбавілі права на прафэсію! Піша ў сваім блогу Аляксандар Класкоўскі.
Тэкст Канстытуцыі, гадавіну якой днямі адзначалі, падпісаў у 1994 годзе сьпікер Мечыслаў Грыб. Ён, генэрал міліцыі, і ў благім сьне ня мог тады прымроіць, што праз колькі гадоў будзе... хавацца ад міліцыянтаў пасьля шэсьця на Дзень Канстытуцыі.
І гэта быў не адзіны горкі глыток з чашы апазыцыянэра.
Ці ведаеце вы, што яго, заслужанага юрыста Рэспублікі Беларусь, на 59-м годзе жыцьця змусілі, нібы студэнта, цягнуць білет на іспыце ў пытаньнях права?
Гісторыя такая. Пасьля разгону Вярхоўнага Савету трэба ж было зарабляць нейкую капейчыну. Маючы адвакацкую ліцэнзію, Грыб уладкаваўся ў юрыдычную кансультацыю сталічнага Партызанскага раёну.
Прарабіў з паўгоду. Але ў траўні 1997-га зьявіўся дэкрэт №12 — "Пра некаторыя захады ў справе ўпарадкаваньня адвакацкай і натарыяльнай дзейнасьці...". Паводле дэкрэту ўтварылі атэстацыйную камісію. Хочаш пацьвердзіць права на ліцэнзію — ідзі цягні білет на іспыце.
Грыб выдатна разумеў, што ўжо каму-каму, а яму, "перабежчыку" ў лягер апазыцыі, наладзяць выпрабаваньне па поўнай праграме.
Але генэрал вырашыў бяз бою не здавацца. Закусіў губу — і пайшоў на іспыт, як той студэнт.
"Гадзіны са дзьве ганялі, — узгадваў Грыб. — Потым кажуць: выйдзіце за дзьверы і пачакайце рашэньня. Яшчэ ці ня дзьве гадзіны мусіў шнураваць па калідоры. Нарэшце запрашаюць. Сэнсацыя! Экзамэн здаў. Але рана радаваўся. Неўзабаве даведваюся: прызналі мяне ня вартым ліцэнзіі нягледзячы на ўдалы іспыт. Фармулёўка езуіцкая: за парушэньне адвакацкай этыкі".
А падставу адкапалі такую: нібыта парушыў грамадскі парадак падчас масавай вулічнай акцыі на трэцюю гадавіну Канстытуцыі.
Яшчэ больш, кажа Грыб: "Мяне ж міліцыянты пільнавалі пад дзьвярыма ўласнай кватэры пасля таго шэсьця ў сакавіку 97-га. Так некаму карцела ў "бамжатнік" запіхнуць былога сьпікера...".
Іронія лёсу: тое мерапрыемства да ўгодкаў Асноўнага закону было нават санкцыянаванае.
"Тады яшчэ не выпіхвалі на Бангалор, — успамінае Грыб. — Калёне было дазволена рухацца з плошчы Якуба Коласа да опэрнага тэатру. Людзей сабралася нямала. І ў нейкім вузкім месцы маршруту, каб ня ціснуцца, колькі мэтраў частка калёны прайшла па праезнай частцы. На транспартным руху тое ніяк не адбілася. Але ж фармальную зачэпку ўлады атрымалі. І як жа было ёю не скарыстацца! Карацей, пачалося паляваньне на найболей прыкметных удзельнікаў акцыі".
А тут яшчэ такі нюанс. Пасьля шэсьця Грыб трохі пасядзеў у кавярні са сваім сватам — Паўлам Казлоўскім. Так, тым самым — былым міністрам абароны. (Калі хто ня ведае: ягоны сын жанаты на Грыбавай дачцэ.) У экс-міністра акурат быў дзень народзінаў, і сваякі-генэралы палічылі, што ня грэх падняць па чарцы.
Ну а потым...
"Толькі вярнуўся дадому — звоняць у дзверы, — распавядаў мне потым Мечыслаў Грыб. — Міліцыя! Уяўляеце, якім я быў на той момант падарункам для нядобразычліўцаў! Былы сьпікер мала што парушаў грамадзкі парадак падчас масавага мерапрыемства, дык яшчэ і трохі нападпітку! Акрамя таго, напэўна пратрымалі б у так званым бамжатніку ўсе выходныя. Справа ж была ў пятніцу. А суд раней за панядзелак не распачаўся б. На такое прыніжэньне я не пайшоў і дзьверы адчыняць ня стаў".
Са слоў Грыба, тыя служакі ўсю ноч на лесьвічнай пляцоўцы сядзелі. Шалупіньня ад семак наплявалі цэлую гару.
Але генэрал зь белым сьцягам ня выйшаў :)
Сьмяецца (ён увогуле чалавек з гумарам): "Аддаў сябе ў рукі айчыннай Фэміды толькі ў панядзелак. Хоць у тым клапоўніку, дзякуй богу, сядзець не давялося. Затое штраф упяклі шалёны — аж 20 мільёнаў беларускіх рублёў! Гэта адпавядала тады васьмістам далярам".
Праўда, абскардзіўшы рашэньне ў гарадзкім судзе, суму пашэнціла напалову скасьціць.
Але ж ня толькі ў грашах рэч!
Як той казаў, за дзяржаву крыўдна.
Гэта ж ня проста недарэчны выпадак — гэта сыстэма. Іншы былы сьпікер — Вайтовіч — пачуў на свой адрас з высокай трыбуны такое, што мусіў апэляваць да генпракурора, яшчэ аднаму — Шушкевічу — налічваюць зьдзеклівую пэнсію паўтара даляры...
Ну а гісторыя з Грыбам — проста апатэоз. Удумаемся: чалавека, што падпісаў дзейную Канстытуцыю, за шэсьце ў ейны гонар аштрафавалі і фактычна пазбавілі права на прафэсію!
Такія вось грымасы найноўшай беларускай гісторыі.
На здымку з архіву аўтара: сьпікер Грыб у рэдакцыі "Народнай газэты" часоў Сярэдзіча.
Цяпер чытаюць
Як выглядае стылёвы дом новай рэктаркі Акадэміі мастацтваў коштам паўмільёна даляраў18
Як выглядае стылёвы дом новай рэктаркі Акадэміі мастацтваў коштам паўмільёна даляраў
Пагражаў вайскоўцам раскрыць, хто з іх гомасэксуал, каб выпытаць сакрэты і прадаць Украіне. Вось за што адыёзны функцыянер БРСМ атрымаў 17 гадоў калоніі1212
Каментары