Хакей у Беларусі не адбяруць

Некалькі гадзінамі раней старшыня Міжнароднай федэрацыі хакея Рэне Фазэль заявіў:

«Спорт не можа і не павінен выкарыстоўвацца ў якасці палітычнага інструменту, — сказаў Фазель, адкрываючы 18 мая пасяджэнне кангрэса. — Не думаю, што хтосьці з прысутных тут прыхільнік парушэння дэмакратыі і правоў чалавека. Наша арганізацыя таксама прытрымліваецца прынцыпаў дэмакратыі: кожны мае права ўстаць і сказаць, што ён думае па тым ці іншым пытанні. І так будзе заўсёды. Але я ўпэўнены, што спартыўныя арганізацыі і самі спартсмены не павінны паводзіць сябе як палітыкі і займацца палітычнымі справамі. Мы не павінны быць лялькамі ў руках палітыкаў або актывістаў.

Спорт не можа і не павінен выкарыстоўвацца ў якасці палітычнага інструменту».

На думку кіраўніка IIHF, спорт, у адрозненне ад палітыкі, павінен дапамагаць згладжваць пэўныя вуглы і канфлікты. У якасці прыкладу Фазель прывёў некаторыя падзеі 70-х гадоў XX стагоддзя: матчы па настольным тэнісе паміж ЗША і Кітаем, а таксама славутую хакейную суперсерыю паміж Савецкім Саюзам і Канадай, якія, паводле слоў Фазеля, дапамаглі «растапіць лёд» у адносінах паміж гэтымі краінамі.

«Я ўпэўнены, што калі мы правядзем чэмпіянат свету ў Беларусі, то, як і ў згаданых мной выпадках, гэта дапаможа палепшыць сітуацыю.

***

Як раней паведамлялася, 18 мая на кангрэсе IIHF беларуская дэлегацыя павінна выступіць з дакладам аб падрыхтоўцы да чэмпіянату свету 2014 года ў Мінску.

Паводле слоў старшыні Беларускай федэрацыі хакея Яўгена Ворсіна, пытання аб пераносе ЧС-2014 з Беларусі ў іншую краіну на парадку дня кангрэса няма. «Усё ціха, спакойна. Парадак дня зацверджаны. Пытання аб адмене чэмпіянату свету ў Мінску ў ім няма. Сёння ў яго таксама не было ўнесена ніякіх дадатковых пытанняў, якія тычыліся б нашай краіны. Вядома, я не магу гарантаваць, што заўтра на кангрэсе які-небудзь дзівак з месца чагосьці не скажа на гэту тэму, але нічога абмяркоўвацца не будзе: гэтага чалавека, калі такое адбудзецца, проста пасадзяць на месца», — сказаў Ворсін у каментарыі БелаПАН 17 мая.

Заклікі аб неабходнасці пазбавіць Беларусь права на правядзенне ЧС-2014 пачалі з’яўляцца неўзабаве пасля падзей 19 снежня 2010 года,

У лютым гэтага года шведскія СМІ паведамілі, што на майскім пасяджэнні кангрэса месца правядзення ЧС-2014 можа быць перагледжана.

З заклікам перанесці месца правядзення спаборніцтваў выступіў Еўрапарламент, а еўрадэпутаты Марэк Мігільскі (Польшча) і славуты ў мінулым славацкі хакеіст, член Залы хакейнай славы Петэр Шцясны арганізавалі інтэрнэт-акцыі па зборы подпісаў за адмену чэмпіянату ў Беларусі.

Аб неабходнасці пазбавіць Беларусь чэмпіянату свету неаднаразова заяўляў і міністр спорту Фінляндыі Паава Архінмякі.

У пачатку гэтага тыдня 28 амерыканскіх кангрэсменаў заклікалі прэзідэнта IIHF Рэне Фазеля не праводзіць ЧС-2014 у Мінску. У іх лісце зазначаецца: хаця палітзняволеныя Андрэй Саннікаў і Дзмітрый Бандарэнка вызвалены, многія іншыя апазіцыянеры працягваюць заставацца ў турмах, а актывісты грамадзянскай супольнасці па-ранейшаму зведваюць арышты і запалохванні.

«Рэпрэсіўны клімат у Беларусі вымушае ўсумніцца ў дабрабыце, бяспецы і свабодзе перамяшчэння для гульцоў, афіцыйных асоб, гледачоў і сродкаў масавай інфармацыі і з’яўляецца сур’ёзнай прычынай для сумненняў у тым, што чэмпіянат можа праводзіцца ў Мінску ў 2014 годзе», — сказана ў лісце.

Амерыканскія кангрэсмены заклікалі кожнага члена IIHF запатрабаваць ад уладаў Беларусі вызвалення палітзняволеных, каб не пазбавіцца права прымаць у сябе чэмпіянат.

У адказ на такія заклікі прэзідэнт IIHF неаднаразова заяўляў, што першынство пройдзе ў Мінску. «Мы знаходзімся ў баку ад палітычных дыскусій», — падкрэсліваў Рэне Фазель.

Месца правядзення чэмпіянату свету па хакеі мянялася толькі аднойчы: пасля таго як у 1968 годзе Савецкі Саюз акупіраваў Чэхаславакію, вясновы чэмпіянат свету 1969 года, які планаваўся ў Празе, быў перанесены ў Стакгольм.

• 0
• 0
• 0
• 0
• 0
• 0
• 0
• 0