Захараў — кандыдатам на пасаду асістэнта галоўнага трэнера «Дынама» (Мінск)
Галоўны трэнер мінскага «Юнацтва» і былы галоўны трэнер зборнай Беларусі Міхаіл Захараў з’яўляецца адным з кандыдатаў на пасаду асістэнта Кары Хейкіля ў мінскім хакейным «Дынама». Аб гэтым 1 чэрвеня на сустрэчы са СМІ паведаміў спартыўны дырэктар клуба Ігар Матушкін.
«У трэнерскім штабе ў нас засталася вакансія яшчэ аднаго асістэнта. Кола кандыдатаў — пяць беларусаў і адзін расіянін. Сярод іх ёсць і Аляксандр Андрыеўскі, які адпрацаваў два з паловай гады ў сістэме клуба, быў памочнікам Хейкіля на чэмпіянаце свету. Міхаіл Захараў? Так, ён таксама ўваходзіць у лік прэтэндэнтаў на гэтую пасаду. Хаця я не ведаю, у сувязі з тым, што яны хочуць гуляць у КХЛ, гэта будзе складана зрабіць», — адзначыў Матушкін.
Паводле яго слоў, па просьбе галоўнага трэнера Кары Хейкіля «Дынама» заключыла пагадненне з новым трэнерам па варатарах — фінскім спецыялістам Ары Хілі. «Ён выхаваў шэраг добрых варатароў, якія гуляць у НХЛ. Мы спадзяемся, што Ары падцягне Лаланда і Хаўгена, а таксама маладых беларускіх галкіпераў Шэляпнёва і Карнаухава», — заўважыў Матушкін.
Спартыўны дырэктар таксама аб’явіў аб працягу кантракта з трэнерам Яўгенам Папіхіным. «Яго праца ў мінулым сезоне не выклікала ніякіх пытанняў», — падкрэсліў Матушкін.
Як запэўніў журналістаў спартыўны дырэктар «Дынама», у клуба не ўзнікла ніякіх сумненняў у трэнерскім таленце Кары Хейкіля пасля няўдалага выступлення зборнай Беларусі на чэмпіянаце свету.«Сумненняў у дачыненні да Хейкіля ў нас няма, — заявіў Матушкін. — Кары першы раз працуе ў сістэме зборных і ў гэтым ёсць свая спецыфіка. Адна справа — праца ў клубе, іншая — у нацыянальнай камандзе». Паводле слоў Матушкіна, у кантракце з Хейкіля няма пункта аб магчымасці датэрміновага спынення супрацоўніцтва па ініцыятыве клуба.
З 9 ліпеня «Дынама» плануе даць магчымасць пачаць трэніроўкі ўсім хакеістам, якія знаходзяцца ў сістэме клуба. Афіцыйна падрыхтоўку да новага сезона клуб пачне 23 ліпеня.
Каментары