Літва папрасіла Беларусь прыпыніць падзенне ўзроўню вады ў Нёмане. Яшчэ 2 жніўня літоўскае МЗС накіравала ноту ў беларускае знешнепалітычнае ведамства, у якой заклікае ўлады краіны прыняць неадкладныя меры для прыпынення зніжэння ўзроўню вады ў рацэ Нямунас (Нёман), інфармаваць аб прычынах гэтага і дазволіць экспертам з Літвы ацаніць сітуацыю на тэрыторыі Беларусі.
«Нота была адпраўлена ў выніку таго, што 28 ліпеня ўзровень вады ў рацэ ў раёне Друскенікаў упаў ніжэй за экалагічныя межы, што ўяўляла пагрозу для экасістэмы ракі і навігацыі, — гаворыцца ў паведамленні МЗС Літвы. — Паводле ацэнкі літоўскіх экспертаў, гэта з’ява не была звязаная з натуральнымі працэсамі, а магла быць выклікана дзейнасцю чалавека. На думку экспертаў, небяспечнае падзенне ўзроўню вады магло быць зафіксавана пасля запаўнення вадасховішча Гродзенскай ГЭС».
Па гэтай прычыне Міністэрства аховы навакольнага асяроддзя Літвы, у сваю чаргу, звярнулася ў Міністэрства прыродных рэсурсаў і аховы навакольнага асяроддзя Беларусі.
