Славамiр Адамовiч
ВАРШАЎСКIЯ ВЕРШЫ
АПТЫМIСТЫЧНЫЯ РАДКI Ў ЧАС АДВЭНТУ
Над нашай Вiльняй зорнае неба,
у «Нашай Нiве» зварылi каву,
таварыш пайшоў па хлеб i да хлеба,
а ў мяне якiсьцi настрой кучаравы.
Панi Юдзя на кухнi шынкуе капусту,
я адкаркоўваю пiва «Жывец»
i намазваю масла на хлеба лусту,
нiбы жоўты пясочак на ўласны капец.
6 сьнежня 1998 году, Варшава
***
Мароз. Нiкога не люблю
(часова).
Паўзе нiзамi курс валют,
як гук басовы.
Купляю ў краме капялюш
вялiкi, чорны,
каб захiнаў мяне ад сьцюж
сырых, надворных.
Заходжу ў паб, дзе пiва дух,
i п’ю там каву,
раве з дынамiка рок-зух —
радыё «Wawa».
13 сьнежня 1998 году, Варшава
МАКАБРЫЧНЫЯ СТРОФЫ ДА ВАРШАВЫ
Ад Belfastu 1 да Makabry 2,
па Маршалкоўскай 3, праз Новы Сьвят 4
я iду, беларускi, зграбны,
пяшчотны i цёплы, нiбы пассат.
Iду свабодны, пiльны, вясёлы,
наведваю антыкварныя крамы...
Варшава, ня трэба высокiх словаў,
мне вядомы кошт хлеба i Ramy 5.
Свой хросны ход спыню ў Praksime 6,
запрашу варшавянку на цiхi танец,
але застануся верны Радзiме,
як невядомы варшаўскi паўстанец.
14 сьнежня 1998 году, Варшава
1 Belfast — начны паб на вулiцы Пулаўскай у Варшаве.
2 Makabry — неафiцыйная назва таннага бiстро-бара на вул. Кракаўскае Прадмесьце, у якiм зьбiраюцца варшаўскiя студэнты i анархiсты.
3 Маршалкоўская, 4 Новы Сьвят — цэнтральныя вулiцы Варшавы.
5 Rama — гатунак iмпартнага маргарыну, якi карыстаецца попытам у беларускiх сьледчых турмах.
6 Praksima — клюб i дыскатэка варшаўскiх студэнтаў (знаходзiцца ў раёне вулiцы Жвiркi i Вiгуры).
Цяпер чытаюць
Памятаеце былога памежніка, які стаў дальнабойшчыкам і ў Германіі прызнаваўся ў любові да Лукашэнкі? З ім бяда16
Каментары