СЭНСАЦЫЯ ПРАЦЯГВАЕЦЦА
Яшчэ адныя вынiкi перапiсу
У апошнiм нумары «НН» славуты навуковец д-р Ганорыс Каўза апублiкаваў вынiкi дасьледаваньня прозьвiшчаў у тэлефонных даведнiках, зь якiх вынiкае, што беларусаў няма, а ёсьць лiцьвiны й надзвычай агрэсіўная меншасьць — сакуны. Гэтыя зьвесткi я папрасiў пракамэнтаваць свайго блiзкага знаёмага, аднаго зь вядучых адмыслоўцаў у галiне этналёгii — прафэсара Тутсiфiловiча.
Факт несупадзеньня зьвестак афiцыйнага перапiсу з вынiкам аналiзу прозьвiшчаў у тэлефонных даведнiках зусiм не зьдзiвiў паважанага прафэсара. Ён растлумачыў, што афiцыйныя зьвесткi — гэта яшчэ толькi сьпiс нацыяў.
Каб атрымаць вынiкi перапiсу, iх, як паказвае само гэтае слова, трэба перапiсаць наноў, што й зрабiў паважаны д-р Ганорыс Каўза. Сп.Тутсiфiловiч ня згодны з тым, што новай нацыянальнай большасьцю сталiся лiцьвiны. Найбольшы з народаў — паказаў ён пальцам — пазначаны ў сьпiсе пад нумарам 8. Гэта агуламы, назва якiх памылкова пададзеная там у адзiночным лiку. Яны вызнаюць будызм (як вiдаць з назову — агу, ламы!) i, дасягнуўшы нiрваны, абыякавыя да становiшча ў краiне.
Згодна зь iншай гiпотэзай, ваяўнiчыя iндзейцы агуламы названыя так з-за воклiчу, якiм яны гукалi свойскую жывёлу. Яны перакачавалi на ўсход разам з NATO i сталiся велiзарнаю небясьпекай для свайго ўсходняга суседа — расейцаў. Напрыклад, яны сiлком адабралi ў iх лiтару «ё», так што яна больш не сустракаецца ў расейскiх газэтах i кнiгах — хто ня верыць, можа праверыць. Як паведаміла адна iншаземная выведка, апошнiя перамогi чачэнцаў тлумачацца якраз тым, што загады расейскім войскам аддавалi, не ўжываючы «ё» i выразу на яе аснове, i такiя загады аказаліся незразумелымi для жаўнераў.
Шаноўнага спадара Тутсiфiловiча надзвычай засмуцiла тое, што прадстаўнiкi двух вельмi слынных народаў, на жаль, цалкам зьнiклi з этнiчнай карты нашай краiны. Адныя зь iх ужо даўно жывуць тут i таму ўзялi сабе iмя «тутыя»; а другiя прыйшлi яшчэ за балцкiм субстратам, i таму яшчэ тутэйшыя за iх. Нечаканае й трагiчнае зьнiкненьне гэтых нацыяў, напэўна, i сталася галоўным вынiкам перапiсу.
Сержык Карбоўскi
Цяпер чытаюць
Чым цяпер займаюцца дзяўчаты, якіх летась назвалі самымі прыгожымі ў Беларусі?7
Чым цяпер займаюцца дзяўчаты, якіх летась назвалі самымі прыгожымі ў Беларусі?
Містычнае кола Вільні: Каліноўскі быў пахаваны з медальёнам святыні, каля якой вырас гатычны палац доктара з-пад Оршы. Цяпер парэшткі Каліноўскага перапахавалі ў магільні таго ж доктара2121
Каментары