Інстытут Беларусі?
Беларусь у сьвеце трывала асацыюецца з словамі “Чарнобыль” і “Лукашэнка”. Гэтым веды большасьці замежнікаў пра нашую палітыку, культуру, навуку і гісторыю вычэрпваюцца. Брэнд “Беларусь” застаецца малазразумелым і “нераскручаным”.
Між тым, сакрэт папулярнасьці — у нястомнай прапагандзе: рабі што-небудзь, і пра цябе будуць ведаць! Вунь палякі ўсяляк падтрымліваюць Польскі інстытут, які прапагандуе іх культуру за межамі краіны. Немцы спрыяюць Інстытуту Гётэ, што займаецца аналягічнай дзейнасьцю. Гэтыя ўстановы даўно працуюць у Беларусі. Ёсьць Брытанская рада, гішпанскі Інстытут Сэрвантэса, Баўгарскі інстытут, Японскі фонд…
Хто будзе клапаціцца пра імідж Беларусі ў сьвеце? Міністэрства замежных справаў дбае пра афіцыйныя міждзяржаўныя кантакты. Беларускі інстытут навукі і мастацтва ў Нью-Ёрку (БІНіМ), арганізаваны дыяспарай, выдае кнігі пра Беларусь і беларускае, ладзіць імпрэзы. Аднак ён ня здольны ахапіць увесь сьвет і рэпрэзэнтаваць беларускую культуру цалкам. Хоць бы таму, што знаходзіцца далёка ад Беларусі і сам сілкуецца народжаным за яе межамі.
Многія прадстаўнікі інтэлігенцыі ставяць пытаньне пра стварэньне Інстытуту Беларусі, які б пашыраў сетку сваіх філіяў па ўсім сьвеце, выдаваў бы за мяжой пераклады беларускіх аўтараў, паказваў беларускія кінастужкі, ладзіў выставы беларускіх мастакоў. Ёсьць розныя канцэпцыі таго, на якой базе можна было б стварыць Інстытут Беларусі.
Інстытутам Беларусі мог бы стацца навукова-асьветны цэнтар імя Францішка Скарыны. Але ён знаходзіцца сёньня ў падпарадкаваньні Міністэрства адукацыі, якое мае іншыя задачы. Ці ня варта Скарынаўскаму цэнтру тады адысьці да Міністэрства замежных справаў? Каму, як не дыпляматам, клапаціцца пра імідж краіны, якую яны рэпрэзэнтуюць у сьвеце? Перамовы вядуцца ўжо колькі месяцаў, аднак плёну пакуль не даюць.
Павал Латушка, прэсавы сакратар МЗС, зазначае: “У Міністэрства няма сродкаў на падтрымку ўстановы кшталту інстытуту. Але распаўсюджваньне інфармацыі пра беларускую культуру і гісторыю — адзін з прыярытэтных кірункаў у дзейнасьці замежных установаў Беларусі”.
Ці паспрыяе пераход Скарынаўскага цэнтру пад руку МЗС паўставаньню Інстытуту Беларусі? Паводле якога ўзору ён мусіць стварацца? Меркаваньні праф. Генадзя Цыхуна і дырэктаркі Скарынаўскага цэнтру Любові Ўладыкоўскай-Канаплянік.
Каментары