Дзясяты Менскі міжнародны кніжны кірмаш ды Кніжная выстава-кірмаш адкрыліся 25 лютага ў Выстаўным цэнтры «БелЭкспа». Беларускамоўных кніжак там відавочна бракавала.
| ФОТА IREX-PROMEDIA |
Віцэ-міністар інфармацыі Станіслаў Нічыпаровіч тлумачыць гэта тым, што айчынныя паліграфісты і кнігараспаўсюднікі абкладзеныя вышэйшымі падаткамі, чым расейскія. Гэта выклікае паступовае зьмяншэньне аб’ёму выпуску кніг у Беларусі. Праўда, калі С.Нічыпаровіч кажа, што «ў кожнай кнігарні ёсьць поўны асартымэнт беларускамоўнай літаратуры», ён або выдае жаданае за рэальнае, або не бывае далей за сваю ведамасную кнігарню «Сьветач». Нават у Горадні «поўны асартымэнт» абмяжоўваецца дзясяткам кніг дзяржаўных выдавецтваў. Пра райцэнтры годзе й казаць.
Парадавалі стэнды прыватных выдавецтваў: «Кавалер» — з шыкоўна аформленымі дзіцячымі кнігамі па-беларуску, «Тэхналёгія» — з гуманітарнымі навінкамі. Асаблівы гонар выдавецтва — кніга Ўінтэра і Бэлоўза «Канфлікт і кампраміс. Уводзіны ў палітычную навуку». Аднак наведнікі цікавіліся збольшага краязнаўчай ды гістарычнай літаратурай.
«Беларускі кнігазбор» удзелу ў выставе ня браў. Як патлумачыў выканаўчы дырэктар Г.Вінярскі, іхная распаўсюдніцкая сетка адладжаная і новых рынкаў збыту ў Беларусі «Кнігазбор» папросту ня бачыць.
Украінская сэкцыя глядзелася на зайздрасьць прадстаўніча. «Місія Бандэры», «Гісторыя Турэччыны», «Эканоміка», «Казкі Эўропы» — багацьце назваў пры шыкоўнай паліграфіі. 26 лютага ў «Сьветачы» адкрыўся аддзел украінскай кнігі. Прадстаўнік выдавецтва «Камяняр» жахаецца: «Мы зайшлі ў тутэйшыя кнігарні і схапіліся за галаву — усё завалена расейскамоўнай прадукцыяй. Менавіта прадукцыяй, бо цяжка назваць тыя выданьні яшчэ як-небудзь. На дзьве траціны гэта містыка, эзатэрыка і падобнае».
Дый на выставе ад расейскамоўнай літаратуры ўгіналіся сталы. Самы цымус — дзьве новыя кнігі прозы Васіля Быкава, выдавецтваў «Эксмо» і «Вагрыюс». «Эксмо» апублікавала зборнік твораў В.Быкава ў сэрыі «Чырвоная кніга расейскай прозы». Мы зьвязаліся зь пісьменьнікам. «Ніякай дамовы з «Эксмо» я не падпісваў!» — заявіў ён. Самае цікавае, што да «стварэньня» кнігі прыклалі руку беларускія літаратары. На інтэрнэт-сайце litara.net яны паведамляюць свае імёны.
Адам Воршыч, Мікола Бугай
Цяпер чытаюць
Начальнік крымінальнага вышуку МУС бачыў прагулачны дворык СІЗА КДБ з акна свайго кабінета, а потым сам стаў вязнем6
Каментары