Як украінскі праграміст кіруе гаспадаркай у вёсцы праз інтэрнэт ФОТА
Кажа, гэта як гуляць у Warcraft.
ІТ-спецыяліст з Кіева (Украіна), вядомы толькі пад нікнэймам «2234424», ужо два гады распавядае на форуме stroimdom.com.ua пра тое, як праз інтэрнэт і відэакамеры кіруе гаспадаркай у 200 кіламетрах ад дому. Яго гісторыю перадае ain.ua.
Мужчына працуе на трох працах па 14-16 гадзін на дзень. На загарадную гаспадарку часу не стае, а сям’ю карміць свежымі натуральнымі прадуктамі хочацца. Дапамаглі IP-камеры і наёмныя рабочыя.
У 2011 годзе ІТ-шнік прыглядзеў участак у 200 км ад Кіева, што каштаваў яму каля 10 тысяч даляраў. Але ён не меў часу нават з’ездзіць і паглядзець на яго перад пакупкай — адаслаў кур’ера з фотаздымачом. Яму спадабаліся дом і ўчастак, а таксама наяўнасць лесу непадалёку. Праз тры месяцы арэнды ўчастак быў выкуплены.
Абкладзены цэглай драўляны дом стаіць у вёсцы з 3500-4000 жыхароў, мае агульную плошчу 50 м², жылую — 27 м². На ўчастак праведзеная электрычнасць, але ацяпленне на дровах і газе, вада з калодзежа, а прыбіральня на дварэ.
Першае лета ён правёў у новым доме разам з жонкай, але праца яму гэта «не даравала» — узімку прыйшлося «латаць бюджэт». Але спраў на ўчастку было багата. Прыйшлося наняць мясцовых жыхароў, каб даглядаць за агародам і жывёламі, а таксама рабіць рамонт у доме.
Спачатку ён абсталяваў участак дзвюма IP-камерамі ў гасцёўні і ванным пакоі (каб наёмныя рабочыя не мелі бясплатнай лазенькі для ўсёй сям’і), відэарэгістратарам, роўтарам і мадэмам са знешняй антэнай на даху. Стабільнай карцінкі не атрымлівалася, даходзілі толькі карцінкі ў выпадках, калі ў кадры назіраўся рух. Але ўжо гэта дазваляла кантраляваць выкананне задач наёмнымі рабочымі.
З цягам часу рамонт прасоўваўся, камер дадавалася больш, сігнал станавіўся лепшым, а задачы — цікавейшымі. Сёння камеры (у тым ліку начныя) дазваляюць кіраваць гаспадаркай, мець агарод, свінняў і курэй. Ураджай гаспадару перадаюць праз кіроўцаў міжгародніх маршрутак. А за рабочымі ён можа як сачыць у рэальным часе, так і праглядаць архіў кадраў за дзень. Задачы ім ставяцца па электроннай пошце.
Ужо чатыры гады ІТ-шнік паспяхова вядзе гаспадарку праз інтэрнэт. Апошні раз у вёсцы ён фізічна быў два гады таму, а ў адпачынак апошні раз сыходзіў 10 год таму.
Прадаваць кватэру ў Кіеве і пераязджаць у вёску ён не плануе. Кажа, галоўнае для яго — карміць сям’ю прадуктамі высокай якасці, бо на рынку, на яго думку, няма экалагічна чыстай ежы.
«Мне гэта нагадвае гульню ў Warcraft — здабываеш золата (працуеш у Кіеве) і выдаткоўваеш яго. А рабочыя будуюць пабудовы», — піша ён.
Праз дзевяць месяцаў пасля вызвалення памёр палітвязень Валерый Богдан7
Каментары