Сяргей Штода — кіраўнік ініцыятыўнай групы прэтэндэнткі на пасаду прэзідэнта Наталлі Кісель. У размове з карэспандэнтам «Нашай Нівы» ён прызнаўся, што замест 147 чалавек, якія атрымалі пасведчанні сяброў ініцыятыўнай групы, подпісы збіралі 2500 чалавек. Гэта грубае парушэнне выбарчага заканадаўства.

Сяргей Штода займаецца грузаперавозкамі. У сярэдзіне 2010-х ён ненадоўга ўступаў у АГП. Фота Кірыла Хілько

Пасля публікацыі артыкула ад карыстальніка з імем «Сяргей Штода» адзін за адным пасыпаліся абразлівыя каментары да артыкула. «Аўтар артыкула — д***б», «аўтар артыкула — п***л», «аўтар артыкула — чмошнік».

Тады журналіст вырашыў яшчэ раз пагаварыць са Штодам, каб удакладніць, ці сапраўды ён аўтар тых каментараў і ці не хоча ён выбачыцца.

Адказам Штоды быў паток мацюкоў. Прыводзім стэнаграму размовы.

***

Журналіст: Добры дзень.

Сяргей Штода: Добры.

Журналіст: Сяргей Штода? Гэта Уладзіслаў Швядовіч, мы з вамі гаварылі нядаўна пра колькасць лічбаў вашых падпісантаў. А пасля ў адмінцы сайта з акаўнта, зарэгістраванага на ваш нумар, ідуць каментары пра «автора статьи» з абразамі. Я хацеў спытаць, як мы будзем вырашаць гэтае пытанне: звярнуцца ў суд ці выкласці ў публічны доступ? Можа, хочаце выбачыцца?

Сяргей Штода: Навошта вы гадасці пішаце?

Журналіст: Глядзіце. Я паглядзеў, што ад карыстальніка, якога завуць «Штода Сяргей», які піша каментары, паступаюць даволі непрыгожыя абразы, у тым ліку з парушэннем заканадаўства Рэспублікі Беларусь.

Сяргей Штода: І што?

Журналіст: І я бачу, што гэта акаўнт, зарэгістраваны на ваш нумар.

Сяргей Штода: Ну.

Журналіст: Дык я хачу спытаць: вы хочаце, каб я пайшоў у суд?

Сяргей Штода: Так, я напісаў, што аўтар артыкула — д***б! Калі вы гэта пісалі, то значыць вы д***б і ёсць!

Журналіст: Я запісваю размову, калі што.

Сяргей Штода: Можаце схадзіць у суд ці куды-небудзь яшчэ… Проста для чаго вы такую х*рню пішаце? Гэта несапраўднае, тое, што вы там панапісвалі.

Журналіст: Тое, што я «панапісваў», было запісана падчас нашай размовы з вамі. Вы ведалі, што размова запісваецца.

Сяргей Штода: Навошта вы пішаце, абавязкова ўказваючы, што гэта парушэнне заканадаўства? Для чаго?

Журналіст: А што, гэта не парушэнне заканадаўства, па-вашаму?

Сяргей Штода: Ну хоць бы і парушэнне! Навошта вы гэта агучваеце?

Журналіст: Не трэба гэта агучваць? [Агучваем], каб чытач ведаў, што вы падманваеце людзей.

Сяргей Штода: Вы, можа, думаеце, што нас здымуць за гэта з перадвыбарчай гонкі, так?

Журналіст: Я паняцця не маю.

Сяргей Штода: Дзякуючы вам цяпер будуць журналісты іншыя званіць, і я, дзякуючы «Нашай Ніве»… Вас і так мала хто чытае, што вы, папулярныя нейкія? Не! Увогуле, туфта нейкая гэтая ваша «Наша Ніва»! Туфта!

Журналіст: Вам не сорамна, што вы падманваеце людзей пра гэтыя подпісы?

Сяргей Штода: У чым мы падманваем? У чым?

Журналіст: Вы замест сваіх зборшчыкаў, якіх 147 чалавек, адпраўляеце дзве з паловай тысячы невядомых «пценчыкаў», а пасля вінаваціце мяне, што я пра гэта пішу…

Сяргей Штода: І што? І што?

Журналіст: А чаму пра гэта не трэба пісаць?

Сяргей Штода: Дык а навошта пра гэта пісаць? Навошта?

Журналіст: Спадарыня Кісель у курсе? Гэта яна вам парэкамендавала ці гэта чыста вашы метады, цікава?

Сяргей Штода: У цябе проста з галавой нібыта праблемы.

Журналіст: Не «ў цябе», а «ў вас», па-першае. Па-другое: што будзем рабіць з каментарамі? Мне звярнуцца ў суд?

Сяргей Штода: Можаш схадзіць у суд, але я юрыстаў адпраўлю ўсё роўна, каб вашу «Ніву» трошкі на грошы паставілі.

Журналіст: Окей. Але не хочаце выбачыцца, можа быць?

Сяргей Штода: Ты дурань ці што, бл***, выбачыцца! Сам выдалі артыкул ці падкарэктуй яго! Паводзь сябе як нармальны журналіст, а не як прып****. Навошта ты такую х***ю пішаш?

Журналіст: Вы разумееце, што зараз пад запіс працягваеце мяне абражаць і лаяцца матам?

Сяргей Штода: І што? І што?

Журналіст: Гэта як мінімум адміністратыўны артыкул.

Сяргей Штода: Ідзі затарпедзіруй сабе гэты адміністратыўны кодэкс, бл***, у шакаладнае вока! Зразумеў?

Журналіст: Гэта вельмі смешна. Скажыце, а хто вас выхоўваў?

Сяргей Штода: Што хто?

Журналіст: Хто вас выхоўваў, скажыце?

Сяргей Штода: Што такое «выхоўваў»?

Журналіст: «Воспитывал» вас хто?

Сяргей Штода: Воспитывал?!

Журналіст: Ці, можа быць, вы сядзелі?

Сяргей Штода: Гэта ўжо дакладна не твая справа, хто мяне там выхоўваў і гэтак далей. Вось хто цябе выхоўваў? Для чаго… не існуе такога мужчынскага нейкага, бл***, твару? Навошта такую х***ю пішаш?

Журналіст: То-бок я мушу падманваць чытача, таму што я мужчына і вы мужчына?

Сяргей Штода: Які чытач? Які чытач? 15 чалавек у цябе там чытачоў, бл***!

Журналіст: Ну, вы сябе паводзіце не як мужчына, па-мойму. А наадварот.

Сяргей Штода: Ты сябе не па-мужчынску паводзіш, бл***! Я табе штосьці сказаў пра тое, менавіта як ёсць: у нас так, невялікая ініцыятыўная група, але ў нас іншыя людзі займаліся зборам подпісаў. А ты хутчэй схапіўся: «О, у іх там парушэнні заканадаўства!»

Ну і што? Ну напісаў ты — ты думаеш, хтосьці звяртае ўвагу на вашую гэтую х***у? «Наша Ніва», бл***, нейкая!

Журналіст: Ну вы ж схлусілі. Якія ў вас зборшчыкі подпісаў? У вас пікетаў няма, нічога няма. Вы ж хлусіце мне.

Сяргей Штода: [неразборліва] Я табе сказаў: я табе забараняю публікаваць якую-небудзь інфармацыю з маім прозвішчам! А цяпер я адпраўлю юрыстаў, яны будуць тармашыць вас, «Нашу Ніву», бл***, уздоўж і поперак, разумееш?

Журналіст: Па-першае, я чакаю з нецярпеннем вашых юрыстаў. Па-другое: вы ж схлусілі пра ўсё на свеце. Па-мойму, пра 108 тысяч сабраных вы схлусілі — ніводнага пікета не было. Якія 108 тысяч?

А пасля вы пішаце мне, як школьнік пакрыўджаны. Я не разумею, чаму вы, дарослы чалавек, пішаце, як пакрыўджаны школьнік, мацерныя каментары. Ну гэта ж убога. Вам не здаецца?

Вы ж лічыце сябе мужчынам, я так разумею? Незразумела, праўда, чаму…

Сяргей Штода: Я табе і напісаў па-мужчынску, бл***! Я ж табе сказаў, што ты, аўтар артыкула, — д***б! І я ад гэтых словаў не адмаўляюся! Ты рэальна сябе паводзіш як д***б! Ніводзін журналіст сябе так не паводзіць! Ты сябе паводзіш як мыш шэрагорбая, разумееш? Яму сказалі штосьці, бл***, па тэлефоне, ён узяў хуценька і напісаў! Ты — чмо, бл***, зразумеў?

Журналіст: Я вас папярэдзіў, што буду публікаваць гэтую інфармацыю. Я вас папярэдзіў, што запісваецца размова — як і гэтая.

Сяргей Штода: Публікуй! На памяць сабе напішы, бл***, што цябе лічаць д**бам! Ты проста рэальны д***б! І мужчынскага ў цябе нічога няма і не будзе, бо ты д***б! Бо пішаш усякую х***ю!

Журналіст: Цікава, а спадарыні Кісель не будзе сорамна за вашы паводзіны як кіраўніка яе ініцыятыўнай групы? Што вы паводзіце сябе, як гопнік.

Сяргей Штода: Ты рэальна дурны нейкі, бл***! Звярніся ў Навінкі, хай цябе там трошкі пралечаць!

Журналіст: Добра. Вельмі падабаецца мне тон і кірунак нашай размовы. Яшчэ, можа, хочаце выказацца?

Сяргей Штода: Звярніся на Бехцерава! Там табе акажуць невялікую дапамогу!

Журналіст: Окей. Як скажаце.

Сяргей Штода: Ну!

Журналіст: Прыемна мець з вамі справы, усяго добрага!

Сяргей Штода: Адкарэктуй артыкул!

***

«Наша Ніва» перадала Наталлі Кісель аўдыязапіс размовы з Сяргеем Штодам. Яна адмовілася публічна каментаваць сітуацыю.

Хочаш падзяліцца важнай інфармацыяй ананімна і канфідэнцыйна?