«Панаехалі, валіце ў сваю Украіну!» Беларуску пад міжнароднай аховай пабілі ў Варшаве
40-гадовая Вольга пераехала ў Польшчу ў 2021-м годзе. Жанчына мае міжнародную абарону. Увечары 25 ліпеня яна ішла на сустрэчу са знаёмым, але замест гэтага апынулася ў аддзяленні неадкладнай дапамогі, дзе ёй дыягнаставалі страсенне мазгоў пасля ўдару кулаком у скронь.
Вольга расказвае, як гэта было (усе яе дадзеныя разам з вынікамі медыцынскага даследавання ёсць у рэдакцыі):
«За мной ішоў нейкі мужчына і гучна размаўляў па тэлефоне, крычаў на кагосьці. Я азірнулася, ён гэта заўважыў. Яму гэта не спадабалася.
Ён пачаў крычаць ужо мне, каб не паварочвалася. Неўзабаве я адчула, як ён плюнуў мне ў спіну. Я спынілася, пачала пытаць, што ён робіць — пасля гэтага ён плюнуў мне ў твар. Ён пачаў крычаць: «Чаму вы панаехалі, валіце ў сваю Украіну!». Я вырашыла яго сфатаграфаваць. У выніку ён накінуўся на мяне і ўдарыў кулаком у скронь».
Жанчына кажа, што вакол было досыць шмат людзей, але ніхто не ўмешваўся ў сітуацыю, відаць, думаючы, што гэта звычайны канфлікт паміж знаёмымі.
«А па факце на мяне накінуўся нейкі незнаёмы мужчына!» — абураецца Вольга. Па яе адчуваннях, той быў п’яны. Яна лічыць, што мужчына быў палякам, бо не меў акцэнту. Сама жанчына размаўляла з ім па-польску, але была ў байцы з надпісам «Мой родны кут» — гэта магло выдаць іншаземнасць.
Пасля ўдару Вольга паспела вярнуцца дадому, каб узяць пакет з лёдам і зменшыць боль, але неўзабаве ёй стала зусім дрэнна. Было вырашана выклікаць хуткую дапамогу і званіць у паліцыю.
«Паліцэйскія ў выніку нічога не зрабілі, не ведаю, чаму. Патлумачылі, што калі пашкоджанні няцяжкай ступені, то трэба звяртацца з грамадзянскім пазовам у прыватным парадку. У мяне моцна баліць галава, мне складана размаўляць, я мушу чатыры дні ляжаць дома, я не змагу працаваць.
Гэта ненармальна, што чалавек пад міжнароднай абаронай у выніку аказваецца неабароненым на вуліцы сярод белага дня. Я павінна была сцярпець пляўкі, каб гэтага не здарылася? Ці як сябе паводзіць?» — задаецца пытаннем Вольга.
Дзяўчыне далі кантакты арганізацыі па барацьбе з ксенафобіяй, яна хоча надаць здарэнню максімальную агалоску і зноў пайсці ў паліцыю, як толькі ачуняе.
Цяпер чытаюць
«Ужо там кароў не засталося!»: былы начальнік Качанавай аплаквае стан эканомікі на Полаччыне19
Каментары