Мікрахвалёўкі, кавамашыны і не толькі. Якія тавары працягваюць везці з Польшчы ў Беларусь і колькі на гэтым можна зарабіць
Нягледзячы на тое, што новы пакет санкцый забараняе экспарт шэрагу тавараў з Еўрасаюза ў Беларусь, чаўночны бізнэс працягвае існаваць. Паглядзелі, якія тавары цяпер перавозяць з Польшчы і колькі на гэтым можна зарабіць.
Спіс тавараў скараціўся
Сярод бытавой тэхнікі цяпер прапануюць перавозіць мікрахвалёўкі, варачныя панэлі, духавыя шафы, кавамашыны, куханныя выцяжкі, і пыласосы. Праз санкцыі са спісу зніклі такія папулярныя пазіцыі, як мабільныя тэлефоны, ноўтбукі і тэлевізары.
Больш за ўсё гатовыя плаціць за перавозку духавой шафы. За дастаўку праз мяжу «непрахадной» па вазе і кошце духоўкі абяцаюць 110 даляраў. За кавамашыну коштам каля 550 еўра — 100 даляраў. За мікрахвалёўку вагой 20 кілаграм і коштам да 500 еўра (не трэба размытняць) — 90 даляраў.
Чаўнок замарожвае свае грошы ў выглядзе ПДВ
У прапанове пазначана, што гэтыя тавары не забароненыя для вывазу ў Беларусь, таму польская мытня афармляе на іх зварот VAT (падатак на дададзеную вартасць). Ахвотныя падзарабіць на перакідцы тавараў з Польшчы ў Беларусь мусяць быць гатовыя да таго, што давядзецца замарозіць свае грошы — роўныя суме VAT.
Пры наяўнасці VAT замоўшчыкі перавозкі разлічваюцца з чаўнакамі па цане «нета» плюс узнагарода за працу. Замарожаную суму чаўнакі вяртаюць сабе пры наступнай паездцы.
Апроч бытавой тэхнікі для кухні, з Польшчы перадаюць і іншыя тавары. Так, напрыклад, на перавозцы пыласоса вагой 10,5 кг чаўнок можа зарабіць $60. За чайнік вагой 3 кг — $30, за гладзільную дошку — яшчэ $30.
Гукаўзмацняльную апаратуру легальна вывозіць нельга, таму пры дастаўцы музыкальных калонак замарочвацца з афармленне VAT не давядзецца. Але гэта як мінімум дадатковыя рызыкі.
За правоз такой тэхнікі вагой 10 кг гатовыя плаціць $60.
За дастаўку праз мяжу пары красовак з VAТ чаўнакам прапануюць па $12. Такса на розныя іншыя тавары — па $3 за кілаграм.
Бытавая хімія і корм для жывёл
Прывезці ў Беларусь просяць не толькі тэхніку.
За правоз 6 упаковак вадкага пральнага парашка агульнай вагой 9,5 кілаграма даюць $35. Аўтамабільныя запчасткі перадаюць па стаўках $4-5 за кілаграм.
Корм для жывёл перапраўляюць па $3,5-4 за кілаграм.
Таксама працягваюць перадаваць аўтамабільныя колы, якія чаўнакі мусяць перавозіць пад выглядам запаскі.
Сярод тавараў на перакід трапляюць і даволі рэдкія пазіцыі. Так, напрыклад, электрагітара коштам $228 і вагой каля 6 кілаграм. За яе правоз прапануюць $35. Часам трапляюцца заяўкі на перавоз алкаголю. За 0,7 літра віна гатовыя плаціць $3.
Узнагарода за правоз дзіцячых аўтамабільных крэслаў — ад $13, за дзіцячыя каляскі — ад $30.
За правоз палатак і навесаў гатовыя плаціць ад $25 даляраў за тавар вагой 5 кілаграм да $65 за тавар вагой 15 кілаграм.
Цяпер чытаюць
Лукашэнка знайшоў незвычайныя словы для спачування Хаменеі: «вераломная атака»27
Каментары