Някляеў і Рымашэўскі застаюцца на свабодзе

20 мая суддзя Фрунзенскага суда Мінска Жанна Жукоўская (№ 153 у спісе неўяздных у ЕС) абвясціла прысуды экс-кандыдатам у прэзідэнты Уладзіміру Някляеву і Віталю Рымашэўскаму,

Такім чынам

Уладзіміру Някляеву далі 2 гады пазбаўлення волі з адтэрміноўкай на 2 гады,

Сяргею Вазняку, Аляксандру Фядуту, Віталю Рымашэўскаму, Андрэю Дзмітрыеву — 2 гады ўмоўна, Насце Палажанцы — 1 год умоўна.

С.Вазняк апраўданы паводле артыкула (401) аб ілжэсведчанні.

Нагадаем, што падчас судовых спрэчак, якія прайшлі яшчэ 18 мая, пракурор Андрэй Кажэўнікаў запрасіў для абвінавачаных наступныя пакаранні — Някляеву тры гады пазбаўлення волі з адтэрміноўкай у два гады, Дзмітрыеву — тры гады ўмоўна, Рымашэўскаму, Вазняку і Фядуту — па два гады пазбаўлення волі ўмоўна, Палажанцы — 1,6 году ўмоўна.

Працэс «Някляева — Рымашэўскага» пачаўся 5 мая і працягнуўся больш за два тыдні. Усім падсудным пагражала да трох гадоў пазбаўлення волі (арт. 342, арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх). Сваёй віны не прызналі Уладзімір Някляеў і Наста Палажанка. Іншыя падсудныя часткова пагадзіліся з прад’яўленымі ім абвінавачаннямі.

***

Усяго па справе Плошчы асуджаныя, па стане на 20 мая, 35 чалавек.

14 мая ў судзе Партызанскага раёна Мінска быў абвешчаны прысуд экс-кандыдату ў прэзідэнты Андрэю Саннікаву і чатыром шараговым удзельнікам акцыі. Суддзя Наталля Чацвярткова засудзіла за ўдзел і кіраванне «масавымі беспарадкамі» экс-кандыдата ў прэзідэнты Андрэя Саннікава на 5 гадоў калоніі ўзмоцненага рэжыму, Алег Гнедчык за ўдзел у «масавых беспарадках» асуджаны на 3,5 года, Ілья Васілевіч, Фёдар Мірзаянаў, Уладзімір Яроменак — на тры гады калоніі ўзмоцненага рэжыму. Усе яны абвінавачваліся паводле артыкула «масавыя беспарадкі» (максімальны тэрмін — да 15 гадоў).

Экс-кандыдат у прэзідэнты Андрэй Саннікаў атрымаў 5 гадоў калоніі ўзмоцненага рэжыму, Алег Гнедчык — на 3,5 года, Ілья Васілевіч, Фёдар Мірзаянаў, Уладзімір Яроменак— на тры гады калоніі ўзмоцненага рэжыму.

Першым па справе за Плошчу быў асуджаны Васіль Парфянкоў, які атрымаў чатыры гады пазбаўлення волі ў калоніі строгага рэжыму; Аляксандр Атрошчанкаў — да чатырох гадоў у калоніі ўзмоцненага рэжыму; Мікіта Ліхавід — да трох з паловай гадоў пазбаўлення волі, Дзмітрый Новік і Аляксандр Малчанаў — да трох з паловай і трох гадоў у калоніі ўзмоцненага рэжыму адпаведна; грамадзяне РФ Арцём Брэус і Іван Гапонаў — да штрафу ў 300 базавых велічыняў (10,5 млн. рублёў) кожны; Дзмітрый Мядзведзь — да трох гадоў абмежавання волі без накіравання ў папраўчую ўстанову. Алесь Кіркевіч асуджаны на 4 гады зняволення, Павел Вінаградаў — на 4 гады, Андрэй Пратасеня — 3 гады, Зміцер Дрозд — на 3 гады, Уладзімір Хамічэнка — 3 гады.

Уладзімір Лобан асуджаны да 3 год пазбаўлення волі, Андрэй Федаркевіч — да 3,5, Яўген Сакрэт — да 3, Сяргей Казакоў — да 3, Дзмітрый Даронін — да 3,5 гадоў у калоніі агульнага рэжыму, Віталь Мацукевіч — да 3 гадоў калоніі строга рэжыму.

За падрыхтоўку дзеянняў, што парушаюць грамадскі парадак (арт. 342), на 2 гады калоніі агульнага рэжыму быў асуджаны каардынатар «Еўрапейскай Беларусі» Зміцер Бандарэнка.

Павел Севярынец быў асуджаны на тры гады абмежавання волі з накіраваннем у месца адбыцця пакарання (г.зн. хіміі), жонка Андрэя Саннікава, журналістка Ірына Халіп на два гады абмежавання волі з адтэрміноўкай на два гады, такі ж тэрмін атрымаў і кіраўнік штаба Мікалая Статкевіча Сяргей Марцалеў.

Апроч таго, за злоснае хуліганства былі таксама асуджаныя Зміцер Дашкевіч і Эдуард Лобаў — на два і чатыры гады пазбаўлення волі адпаведна. Іх затрымалі 18 снежня, за дзень да прэзідэнцкіх выбараў.

***

Абвяшчэнне прысуду кандыдатам у прэзідэнты Мікалаю Статкевічу і Дзмітрыю Усу (пракурор запатрабаваў 8 і 7 гадоў калоніі адпаведна), а таксама пяці шараговым удзельнікам акцыі перанесена з прычыны хваробы суддзі.

• 0
• 0
• 0
• 0
• 0
• 0