Прапаганда ганарыцца, што ВУП хутка расце, а беларусы сталі жыць нашмат багацей. Але ёсць нюансы
Перад выбарамі 2025 года дзяржпрапаганда актыўна прасоўвае наратывы, што нібыта за апошні тэрмін, што Лукашэнка ўтрымлівае ўладу, жыццё беларусаў стала лепшым. Некаторыя паказчыкі эканомікі ставяць гэта пад сумнеў.
Наколькі вырас ВУП?
Прапаганда выхваляецца тым, што другі год запар тэмпы росту эканомікі Беларусі пераўзыходзяць сярэднесусветны ўзровень. Праўда, забываюцца на тое, што гэта рост на аснове нізкай базы пасля спаду на 4,7% па выніках 2022 года.
Агулам за апошнія 5 гадоў ВУП Беларусі вырас прыблізна на 6%. То-бок калі разглядаць пяцігадовы перыяд, то ВУП у Беларусі расце вельмі сціпла. Асабліва ў параўнанні з еўрапейскімі суседзямі.
За гэты ж перыяд ВУП Літвы вырас на 15%, а ВУП Польшчы на 18%.
Беларусы ніколі не жылі лепей, чым цяпер?
Іншым галоўным дасягненнем апошняга тэрміну называюць рост рэальных заробкаў на 25,3% за гэты перыяд.
Сярэдняя налічаная зарплата за верасень 2023 года (больш свежых даных пакуль няма) склала 2314 рублёў, што на той момант было эквівалентам 725 даляраў. «На рукі» гэта каля $624.
У верасні 2019 года сярэдняя налічаная зарплата складала 1108 рублёў, або $534 (даляр тады каштаваў каля 2,08 рубля), гэта каля $459 «чыстымі».
Таму зарплата за гэты перыяд сапраўды вырасла, прычым як у рублёвым, так і ў даляравым вымярэнні.
Але цяперашнія заробкі з папраўкай на інфляцыю даляра не дацягваюць да паказчыкаў 11-гадовай даўніны.
Пікавая зарплата была зафіксаваная па выніках жніўня 2013 года — $622 «бруднымі», ці $535 пасля выліку падаткаў.
Інфляцыя даляра за 11 гадоў склала 32,52%. Атрымліваецца, для таго каб застацца на ўзроўні другой паловы 2013 года, сярэдняя зарплата цяпер мела б быць 709 даляраў «на рукі».
У ранейшым каментары «Нашай Ніве» на тэму дасягненняў у эканамічным развіцці эксперт «BEROC» Зміцер Крук адзначаў, што ў 2012 годзе ўзровень дабрабыту Беларусі дасягнуў каля 75% ад узроўню суседніх краін ЕС — і гэты быў пікавы паказчык. Пасля ён пачаў горшаць і разрыў паміж нашай краінай і Польшчай з Літвой толькі павялічваецца.
Цяпер чытаюць
Бабарыка расказаў, чаму перад выбарамі не шукаў падтрымкі ў Расіі. І як яго хацелі звольніць з Белгазпрамбанка за лозунг «Жыве Беларусь!»23
Бабарыка расказаў, чаму перад выбарамі не шукаў падтрымкі ў Расіі. І як яго хацелі звольніць з Белгазпрамбанка за лозунг «Жыве Беларусь!»
Максім Знак пра прэс-канферэнцыю ва Украіне: Мы дамовіліся не ўздымаць найбольш балючыя тэмы — катаванняў, санкцый, вайны. Можа, мусілі мы па-іншаму зрабіць1010
Каментары