Зь сямі цудаў сьвету, якія былі названыя больш за 2000 гадоў таму, сёньня засталіся толькі эгіпэцкія піраміды. 07.07.07 ў выніку ўсеплянэтнага галасаваньня паўстане новая сямёрка.
 |
Зь сямі цудаў сьвету, якія былі названыя больш за 2000 гадоў таму,засталіся толькі эгіпэцкія піраміды. Швайцарская арганізацыя New 7 Wonders арганізавала галасаваньне, паводле якога паўстане новая сямёрка.
Першы сьпіс сямі цудаў сьвету стварыў грэцкі паэт Антыпатэр Сыданійскі. Гэта быў свайго кшталту даведнік для падарожнікаў. Ён зьмяшчаў сем найбуйнейшых дасягненьняў старажытнай архітэктуры: піраміду Хэопса, cады Сэміраміды, храм Артэміды ў Эфэcе, статую Зэўса ў Алімпіі, Галікарнаскі маўзалей, калёс Радоскі i Александрыйскі маяк на Фаросе. Ужо ў сярэднявеччы шмат якія аб’екты зь сямёркі не існавалі. Адзінае, што захавалася да сёньня, гэта піраміда Хэопса ў Эгіпце.
Прыватная арганізацыя New 7 Wonders Foundation зь сядзібай у Швайцарыі складае новы сьпіс сямі самых прыгожых помнікаў сьвету. Адзін з ініцыятараў акцыі — прафэсар Фэдэрыка Маёр, былы генэральны дырэктар UNESCO.
На сёньня дзень у рэйтынгу лідзіруюць наступныя аб’екты: атэнскі Акропаль у Грэцыі, старажытны горад майя Чычэн‑Іца ў Мэксыцы, рымскі Калізей, Эйфэлева вежа ў Парыжы, руіны гораду інкаў Мачу‑Пікчу ў Пэру, руіны гораду Пэтра ў паўднёва‑заходняй Ярданіі, каменныя статуі на востраве Пасхі, Стоўнгендж у Вялікабрытаніі, сьвятыня Тадж‑Магал у Індыі, будыйская сьвятыня Анґкор у Камбоджы, крэпасьць Альгамбра ў Грэнадзе ў Гішпаніі, Айя‑Сафія ў Стамбуле, будыйская сьвятыня Кіёмідзу ў Японіі, Красная Плошча і Крэмль у Маскве, палац XIX‑га стагодзьдзя Нойшванштайн у Баварыі, статуя Свабоды ў Нью‑Ёрку, статуя Хрыста Збаўцы на гары Каркаваду, якая ўзносіцца над Рыё‑дэ‑Жанэйра, будынак Опэры ў Сыднэі (Аўстралія) i старажытны горад Тымбукту ў Малі.
Эгіпэцкія піраміды апынуліся па‑за конкурсам — ім быў нададзены статус ганаровага кандыдата пасьля таго, як улады Эгіпту запратэставалі супраць таго, каб гістарычная і неаспрэчная каштоўнасьць пірамідаў выстаўлялася на галасаваньне.
На гэты час у інтэрнэт-галасаваньні, якое будзе доўжыцца да 7 ліпеня, прынялі ўдзел ужо звыш 45 млн. чалавек.
07.07.07 у Лісабоне арганізатары абвесьцяць сьпіс новых сямі дзівосаў сьвету.
Фота new7wonders
Каментары