Chronika

Na schodach

27 červienia ŭ Ivacevičach byli zatrymany šeść udzielnikaŭ schodu pa vybarach delehataŭ na Kanhres demsiłaŭ. Zatrymanamu karespandentu «Haziety dla vas» Siarhieju Skułaŭcu, ź jahonych słovaŭ, supracoŭniki Bieraściejskaha KDB prapanavali zapłacić štraf u 60 bazavych vieličyń albo dać zhodu na supracoŭnictva.

U Babrujsku 23 lipienia milicyjanty, supracoŭniki MNS i ludzi ŭ cyvilnym sprabavali sarvać schod pa vyłučeńni delehataŭ na Kanhres demsiłaŭ. Jany ŭvarvalisia ŭ dom siabra PBNF dy skłali pratakoł na haspadara za arhanizacyju niesankcyjanavanaha schodu.

Aktyvistcy AHP Ludmile Krasnasielskaj z Kalinkavič paśla schodu stali prychodzić pozvy, kab jana źjaviłasia na hutarku da namieśnika načalnika rajadździełu milicyi Krasnova.

Cisk na palakaŭ

Staršyniu Sajuzu palakaŭ Anžaliku Borys 21 lipienia ŭ 18.30 milicyjant chacieŭ dastavić u Leninskuju rajonnuju prakuraturu Horadni. Jana admoviłasia jechać tudy — skončyŭsia pracoŭny dzień. Paśla hetaha pradstaŭnik prakuratury pryjechaŭ sam: jon aficyjna papiaredziŭ Borys, kab jana nie zaminała sklikać Hałoŭnaje praŭleńnie SPB u starym składzie (vybranym na pazaminułym źjeździe arhanizacyi), kab jano sklikała paŭtorny VI źjezd Sajuzu.

Haradzienskaja drukarnia 21 lipienia admoviłasia drukavać numar hazety «Głos znad Niemna», jaki vydajuć prychilniki eks-staršyni SPB Tadevuša Kručkoŭskaha. Pryčyna — zapazyčanaść.

MZS 21 lipienia vyrašyŭ spynić dziejnaść Eŭrapiejskaha fondu «Dyjaloh», zarehistravanaha ŭ Varšavie, abvinavaciŭšy jaho ŭ špijonskaj dziejnaści. Paviedamleńnie pra heta było ahučana ŭ teleprahramie «Panarama».

Papiaredžańnie hazecie

Mininfarmacyi vyniesła 15 lipienia papiaredžańnie redakcyi niedziaržaŭnaj hazety «Vitiebskij kuŕjer M». Vydańniu zakidajuć, što jano nie prajšło pierarehistracyi ŭ suviazi ź źmienami ŭ naźvie, a taksama niapravilna padaje infarmacyju ŭ vychodnych źviestkach.

Sarvany letnik

Letnik dla studentaŭ-jurystaŭ, arhanizavany Inavacyjnym fondam pravavych technalohijaŭ (Biełaruś) i zaplanavany na 19—28 lipienia ŭ namiotavym haradku biełaruska-niamieckaha centru «Nadzieja», nie adbyŭsia. Kiraŭnictva centru spasłałasia na «antysanitaryju».

U svabodnych prafsajuzach

Staršyniu supołki Svabodnaha prafsajuzu Biełaruskaha Hienadzia Bykava 19 lipienia chacieli abšukać pry ŭvachodzie na Mienski zavod aŭtamatyčnych linij: administracyja pilnavała, kab prafsajuzny aktyvist nie pranios hazety «Salidarnaść». Bykaŭ nie pahadziŭsia, ale j na zavod nia trapiŭ.

Supołka prafsajuzu REP na Mahileŭskim aŭtamabilnym zavodzie 20 lipienia atrymała čarhovuju admovu ŭ rehistracyi.

Statkievič pierad adpraŭkaj

U Mikoły Statkieviča 20 lipienia ŭ rajonnym adździele milicyi zabrali pašpart, vajskovy bilet i źniali adbitki palcaŭ — pierad adpraŭkaj na «chimiju». Pavodle niekatorych krynic, jaho j Paŭła Sieviarynca majuć adpravić adbyvać pakarańnie ŭ vioskach.

Majomaść apisali paŭtorna

Majno hałoŭnaha redaktara hazety «Priessboł» Uładzimiera Bieražkova 19 lipienia apisali paŭtorna. Pieršy raz apisvali 11 sakavika zhodna z rašeńniem sudu pavodle pazovu ministra finansaŭ, staršyni federacyi himnastyki Mikałaja Korbuta.

Da Maryniča nie puścili

Pasłam Čechii j Słavakii ŭ Biełarusi 19 lipienia nie dazvolili sustrecca z palitviaźniem Michaiłam Maryničam. Kiraŭnik departamentu vykanańnia pakarańniaŭ MUS Uładzimier Koŭčur zajaviŭ, što hałoŭnaja pryčyna admovy — adsutnaść u Maryniča českaha abo słavackaha hramadzianstva. Samoha palityka 21 lipienia pieraviali z turemnaha špitalu ŭ kaloniju.

«Zubroŭcy» ŭ Mahilovie

U Mahilovie 20 lipienia zatrymali aktyvistaŭ niezarehistravanaj arhanizacyi «Zubr» Vaładara Curpanava i Maksima Dvareckaha: jany razdavali minakam niezarehistravanuju hazetu «Vybar». Na ich skłali pratakoły za raspaŭsiud drukavanaj pradukcyi biez vychodnych źviestak, a na Curpanava — jašče j za niepadparadkavańnie patrabavańniam supracoŭnikaŭ milicyi.

Labiedźkavy nadhledziny

19 lipienia pry pajezdcy ŭ Vilniu aŭtamabil Anatola Labiedźki nadhladali dvojčy. Pierš čym prapuścić kiraŭnika AHP, pamiežniki atrymlivali dazvoł ź Miensku.

Da 11-hodździa

U Miensku padčas akcyi, prymierkavanaj da 11-hodździa Łukašenkavaj inaŭhuracyi, aktyvisty «Zubra» praviali niesankcyjanavanuju akcyju ŭ padtrymku palitviaźniaŭ. Amapaŭcy zatrymali Illu Bohdana, Jana Davidoviča, Darju Barabaś, Uładzisłava Nieściera, Alenu Kapač, Natallu i Alaksandra Ŭškoŭ, Alaksandra Kurbackaha (na dvuch apošnich skłali pratakoły za parušeńnie paradku praviadzieńnia vuličnych akcyj).

U toj samy dzień u Viciebsku na Kiraŭskim moście aktyvisty «Zubra» vyviesili raściažku «Svabodu palitviaźniam». Zatrymali Vadzima Darankina, jaki fatahrafavaŭ akcyju. Z pastarunku jaho adpuścili tolki paśla taho, jak zaśviacili stužku.

Napad nacbołaŭ na TBM

Unačy z 23 na 24 lipienia ŭvachodnyja dźviery j šylda na mienskaj siadzibie TBM byli zalityja čornaj farbaj i zaklejenyja nacyjanał-balšavickimi ŭlotkami. Pradstaŭniki arhanizacyi padali zajavu va ŭpravu milicyi Partyzanskaha rajonu Miensku.

Sudy «Narodnaj voli»

Kalehija ŭ hramadzianskich spravach Mienskaha haradzkoha sudu nie zadavoliła 25 lipienia kasacyjnych skarhaŭ redakcyi hazety «Narodnaja vola» na rašeńnie sudu Leninskaha rajonu. Pavodle ich hazeta musić zapłacić štraf Siarhieju Hajdukieviču j trom žycharam Klecku.

Zavadzkaja ŭ prakuratury

25 lipienia Śviatłanu Zavadzkuju vyklikali ŭ prakuraturu Centralnaha rajonu Miensku: śledčy cikaviŭsia padziejami 7 lipienia — padčas razhonu akcyi «Łancuh nieabyjakavych ludziej».

Skrabiec pad vartaj

Da 27 žniŭnia Siarhieju Skrabcu padoŭžany termin utrymańnia pad vartaj.

AŠ

• 0
• 0
• 0
• 0
• 0
• 0
• 0
• 0