«Dadzienyja nie adpaviadajuć... i adpaviadajuć taksama»

Ranica 19 sakavika. Centravybarkam. Niekalki dziasiatkaŭ žurnalistaŭ z BT błukajuć pa faje małoj zali. Napieradzie – sutki ciažkaj pracy pa aśviatleńni «jaskravaj i biassprečnaj». Repartaž Źmitra Dryhajły z Pałacu Respubliki.

Pieršaja pres-kanferencyja Lidzii Jarmošynaj. Pa stanie na 10.00 jaŭka vybarcaŭ skłała fantastyčnyja 40%. Kiraŭnička Centravybarkamu admaŭlajecca nazvać ličby daterminovaha hałasavańnia, zajaviŭšy, što CVK ich admysłova nie ličyŭ. Praź niejki čas na sajcie CVK źjaŭlajucca ličby ŭdziełu ŭ daterminovym hałasavańni: 31,3%. U 2001 h. było 14,3%.

Paśla źjaŭlajecca kiraŭnik analityčnaha centru «Ekaom» Siarhiej Musijenka i prezentuje vyniki ekzyt-połu: u Łukašenki – bolš za 82%, astatnija razam nabirajuć 7%. Suprać usich – 10%. Ale na papiercy nie prastaŭleny čas apytańnia. Musijenka biantežycca: «Zabylisia pastavić». Žurnalisty dzielacca na dva lahiery. Pradstaŭniki pieršaha biahuć pa interviju da Musijenki, druhoha – jeduć praviarać na vybarčyja ŭčastki, jak pracujuć «ekzyt-polery».

Vybarčy ŭčastak u škole pa vuł. Kujbyšava, 19. Dźvie treciakurśnicy BDU i mužčyna hadoŭ pad piaćdziasiat apytvajuć vybarnikaŭ pavodle zvyčajnaj metodyki – adnaho praź dziesiać čałaviek, namahajučysia ŭličvać poł i ŭzrost. Ale ludzi admaŭlajucca havaryć. Za paŭhadziny apytana 19 čałaviek. 16 – admovilisia, adkazali try. Babula – za Łukašenku, kabieta – za Milinkieviča, dziadźka – suprać usich. Pakazvajem dziaŭčynam z «Ekaomu» vyniki, prezentavanyja Musijenkam zranku, prosim prakamentavać: ci roźniacca ad tych, što majuć jany. Dziaŭčyny mianiajucca ŭ tvary. Adna ź ich, Kaciaryna, marmyča: «Hetyja dadzienyja... nie adpaviadajuć... i adpaviadajuć taksama. Ja nie mahu ničoha havaryć...»

Pa stanie na 14.00 jaŭka pa krainie składaje ŭžo 71,1%. Žurnalist BiełaPAN Jury Paciomkin u sercach zapytvaje ŭ sakratara CVK Mikałaja Łazavika, ci moža jaŭka skłaści 103%? Łazavik adkazvaje: «Dziakuj apazycyi za sproby destabilizacyi».

U Pałacy Respubliki sumna. Zadarma prapanujecca kava-harbata, piečyva, hazeta «Sovietskaja Biełoruśsija» za 15 sakavika na krejdavanaj papiery, The Minsk Times, roznyja aficyjnyja časopisy i daviedniki. Usio astatniaje – za hrošy. U tym liku i Internet dla žurnalistaŭ. Heta zrazumieła. Žurnalistaŭ akredytavali 750, kamputaraŭ – tolki 50.

Pad viečar zładzili niekalki pres-kanferencyj roznych naziralnikaŭ zapar. Usie jany zastalisia zadavolenyja j nie zaŭvažyli nijakich parušeńniaŭ. Siarod mižnarodnych naziralnikaŭ – siabry Kamunistyčnaj rabočaj partyi Vuhorščyny, małdaŭski dziejač, jaki pieršy raz naziraje za vybarami, dy «štatny» brytaniec Mark Ełmand, jaki naadvarot naziraje za ŭsimi vybarami ŭ Biełarusi ad 1994 h. i pryznaje, što jany pravodziacca štoraz lepiej. Užo nia kažam pra zadavalnieńnie ad chady j vynikaŭ misijaŭ naziralnikaŭ ad SND i Parlamenckaha schodu Sajuzu Biełarusi j Rasiei.

Tymčasam na Kastryčnickaj stali źbiracca ludzi, i dziaržaŭnyja žurnalisty pabiehli hladzieć na dziva, jakoha ŭ žyćci nia bačyli. Praŭda, pabiehli hladzieć samyja śmiełyja, rešta pajšła ŭ bar, dzie i praviała dźvie hadziny pierad abviaščeńniem pieršych vynikaŭ. U bok płoščy, na jakoj viravaŭ natoŭp u dziasiatki tysiač ludziej, nie paviarnułasia nivodnaja aficyjnaja kamera. Papiarednija vyniki hałasavańnia ŭrazili. Najpierš jaŭka: 92,6% (u 2001 h. – 83,8%).

Vynikovaj pres-kanferencyi Ł.Jarmošynaj dačakalisia ŭsiaho 40 čałaviek. Staršynia CVK abviaściła vyniki kala troch hadzinaŭ nočy: za Alaksandra Łukašenku – 82,6% vybarnikaŭ (5 460 000), za Alaksandra Milinkieviča – 6% (394 693 čałavieki), za Siarhieja Hajdukieviča – 3,5% (250 000 čałaviek), za Alaksandra Kazulina – 2,3% (154 000). U 2001 h. hałasoŭ za Łukašenku było na 800 tys. mieniej. Najbolšuju kolkaść hałasoŭ A.Łukašenka atrymaŭ pa dadzienych z 338 zakrytych učastkaŭ (vajennych častak i bolnicaŭ) – 92,2%.

Udzień pa pustoj Kastryčnickaj płoščy chadzili ministar unutranych spravaŭ Uładzimier Navumaŭ z namieśnikam Viktaram Filistovičam. Na pytańnie «Jak presie pracavać uviečary?» Navumaŭ pakazvaje admysłovaje miesca na prystupkach Pałacu kultury prafsajuzaŭ, adkul budzie potym pramaŭlać Milinkievič: «Voś tut buduć abaznačanyja miescy dla presy, tut budziecie pačuvacca ŭ biaśpiecy». Ale ŭviečary miescy dla presy byli adharodžanyja na supraćlehłym baku płoščy – pad vialikim ekranam. Źjaŭleńnie na im Ł.Jarmošynaj było sustretaje šmattysiačnym vokličam «Hańba!».

Pratakoły vybarčych kamisijaŭ z susiednich učastkaŭ padajuć mocna adroznyja ličby.

• 0
• 0
• 0
• 0
• 0
• 0