Maci zabitaha na Majdanie biełarusa: Miša čałaviečy bol usprymaŭ jak svoj

22 studzienia 25-hadovy Michaił Žyźnieŭski staŭ achviaraju sutyknieńniaŭ na vulicy Hrušeŭskaha ŭ Kijevie. Jon atrymaŭ ranieńnie ŭ serca.

Chłopiec byŭ achoŭnikam na Majdanie. «Ja jaho dobra razumieju. Jon čałaviečy bol usprymaŭ jak svoj i prapuskaŭ praz ułasnaje serca. Usio chacieŭ, kab na Ziamli byŭ mir i spakoj», – havoryć Nina Žyźnieŭskaja.

«U mianie Miša ros biez prablemaŭ. Ja ŭsim svaim siabroŭkam kazała: «Dziaŭčaty, daj Boh, kab u vas byli takija dzietki, jak u mianie». Jak susiedka idzie ź ciažkimi torbami, Miša biažyć, kab joj dapamahčy», – havoryć maci Michaiła Žyźnieŭskaha.

«Čamu Miša tam apynuŭsia? Kab ludzi žyli dy nie ličyli hetych žabrackich hrošaj. Jon zahinuŭ za ludziej. Jon chacieŭ dabra… a nie atrymałasia, sam zahinuŭ», – tłumačyć spadarynia Nina.

Maci zahinułaha taksama raskazała, što ŭ pasolstvie joj prapanavali pryjechać u Kijeŭ. U najbližejšyja sutki, pavodle słoŭ Niny Žyźnieŭskaj, jany z mužam i 18-hadovym unukam płanujuć vyjechać u stalicu Ukrainy dla vyrašeńnia ŭsich farmalnaściaŭ. «Mnie abaviazkova treba pachavać jaho ŭ Homieli, kab jon byŭ tut, pobač, i kab potym mianie taksama pachavali kala jaho», — skazała žančyna.

Pavodle jaje słoŭ, «Miša byŭ vielmi dobrym, haspadarlivym, zachaplaŭsia karate, rycarskimi rekanstrukcyjami, dapamahaŭ va ŭsim, luby čałaviečy bol prapuskaŭ praź siabie».

«U jaho na hetaj hlebie źjavilisia prablemy ŭ 2005 hodzie. Kiraŭnik rycarskaha kłuba ŭziaŭ u kahości hrošy na vyrab siaredniaviečnych daśpiechaŭ. Hrošy jon nie viarnuŭ i schavaŭsia va Ukrainie, prychapiŭšy z saboj Mišu jak žyvy ščyt. Miša ni ŭ čym nie byŭ vinavaty, jamu tady było 17 hadoŭ.

Da 2012 hoda my ničoha nie viedali pra jaho. U 2012 hodzie moj unuk znajšoŭ jaho pa internecie. My sustrakalisia ź im u Kijevie ŭ 2012 hodzie. Pra svajo žyćcio jon mała što raskazvaŭ, kazaŭ, što chacieŭ dapamahčy ŭkraincam, ale płanavaŭ viarnucca damoŭ i žyć tut. Abiacaŭ viarnucca viasnoj 2014 hoda», — skazała Nina Žyźnieŭskaja.

Jana taksama paviedamiła, što z 2005 hoda pa 2012-y sprabavała šukać syna pry dapamozie biełaruskaj milicyi, ale tam ličyli, što Michaił chavajecca ad słužby ŭ armii. «Jon nie chavaŭsia ad armii, jon byŭ pravasłaŭnym chryścijaninam. Jon chacieŭ adsłužyć u armii, a potym pajści ŭ Žyrovicki manastyr», — śćviardžaje žančyna.

U śmierci syna Nina Žyźnieŭskaja vinavacić tych, «chto stajaŭ na dachu i stralaŭ u niavinnych ludziej». «Mišy kula trapiła prama ŭ hrudzi, značyć, stralali metanakiravana prama ŭ jaho. Niachaj hetym nieludziam budzie addadziena pa zasłuhach», — skazała jana.

Pavodle słoŭ žančyny, pytańni z trunoj i dastaŭkaj cieła Michaiła na radzimu rodnym dapamahajuć vyrašać kijeŭskija siabry syna.

• 0
• 0
• 0
• 0
• 0
• 0