Vybary rasctavili ŭsio pa svaich miescach. Tuman raźviejaŭsia, i stała bačnaj dyślakacyja siłaŭ. Vidavočna toje, što majem napałovu maryjanetkavy režym, jaki kirujecca Hryzłovymi i Rušajłami.
Vybary rasctavili ŭsio pa svaich miescach. Tuman raźviejaŭsia, i stała bačnaj dyślakacyja siłaŭ. Vidavočna toje, što majem napałovu maryjanetkavy režym, jaki kirujecca Hryzłovymi i Rušajłami. Šmat chto dziviŭsia: našto było Łukašenku tryvać čatyry dni namiotavaj demakratyi, kab potym za adnu hadzinu likvidavać specnazam. Niama lohiki, kali heta tłumačyć imknieńniem biełaruskich uładaŭ prademanstravać pierad zamiežnymi telekamerami ajčynny liberalizm i pravy čałavieka. Jakija pravy, kali za kratami na toj čas znachodziłasia ci nie pałova siabroŭ pieradvybarčaha štabu Milinkieviča, a na vybary hnali ledź nie humovymi dručkami.
Značyć, chtości nastojliva raiŭ nie čapać peŭny čas mitynhoŭcaŭ na Kastryčnickaj płoščy. Hetym chtości moh być tolki adzin čałaviek – Pucin. Navošta? Kab biełaruski kiraŭnik adčuŭ, što inšaha varyjantu, jak iści sa schilenaj hałavoj da Maskvy, u jaho niama. Hetym ža tłumačycca i zajava «Hazpromu» ab pavyšeńni cany na haz, i depresija Łukašenki. Bo naŭrad ci apošniaha vyvieŭ z raŭnavahi brutalny razhon akcyi pratestu na Dzień Voli. Nijakaj pahrozy dla jaho asabista tyja akcyi nia nieśli.
Ciapier vakoł Biełarusi raźviešanyja bieła-sinie-čyrvonyja ściažki. Palavańnie pačałosia.
Łukašenka budzie adbivacca. Znoŭ pačnucca hadzinnyja vystupy na BT pra toje, jak biełarusy abaraniajuć z zachadniaha kirunku, amal darmova, siastru Rasieju. Znoŭ pačniecca baraćba za trubu i naftapierapracoŭčyja zavody. Straciŭšy trubu i zavody, jon hublaje ŭładu. Ciapier stanoviacca zrazumiełyja jahonyja asobnyja vykazvańni, zroblenyja napiaredadni vybaraŭ. Naprykład, pra toje, što treba pastavić kančatkovuju kropku ŭ pačataj spravie, kab užo nichto nia zdoleŭ źviarnuć Biełaruś z pravilnaha šlachu.
Ale tut uźnikaje jašče adno istotnaje pytańnie: kali demakrytyčnaja suśvietnaja supolnaść nie pryznaje pieraabrańnia na treci termin Łukašenki, dyk ci jość jon ciapier zakonnym subjektam mižnarodnaj palityki? I ci buduć mieć zakonnuju siłu padpisanyja im mižnarodnyja pahadnieńni i damovy?
Ciapier čytajuć
18‑hadovy kursant Vajskovaj akademii ź Lachavič nikomu ničoha nie skazaŭ, zabraŭ dakumienty i pajechaŭ vajavać za Rasiju. Ciapier pa im płačuć50
Kamientary