Hamialčanin Juryj Rubcoŭ špitalizavany paśla 30 sutak źniavoleńnia i haładoŭki
Hramadski aktyvist Juryj Rubcoŭ, jaki vyzvaliŭsia siońnia z homielskaha izalatara časovaha ŭtrymańnia (IČU), špitalavany paśla 30 sutak źniavoleńnia i haładoŭki.
Jak paviedamiŭ BiełaPAN juryst Leanid Sudalenka, Rubcova pavinny byli vyzvalić u 4.10, adnak sustreć jaho kala homielskaha IČU nie ŭdałosia. «U vyznačany čas dziažurny paviedamiŭ, što Rubcoŭ užo vyzvaliŭsia, kudy jaho pavieźli — nieviadoma. Nie viedali, dzie znachodzicca ich muž i baćka, taksama jaho žonka i syn, jakija sustrakali jaho kala IČU. I tolki paźniej svajaki vyśvietlili, što Rubcova vyvieźli ź IČU ŭ Čyhunačny rajadździeł milicyi dla hutarki», — skazaŭ juryst.
Kali Rubcova adpuścili z RAUS, svajaki advieźli jaho ŭ balnicu ŭ suviazi z drennym samaadčuvańniem.
Nahadajem, Rubcoŭ byŭ zatrymany milicyjaj u Minsku 26 krasavika paśla tradycyjnaj akcyi apazicyi «Čarnobylski šlach». Na mitynhu jon byŭ apranuty ŭ futbołku z nadpisami «Łukašenka, sychodź!» i «Aryštujcie mianie! Padstava? Ja suprać Łukašenki». 28 krasavika sud Savieckaha rajona stalicy pryznaŭ jaho vinavatym u «niepadparadkavańni zakonnym patrabavańniam słužbovaj asoby», «drobnym chulihanstvie» i pakaraŭ 25-sutačnym aryštam. Futbołku ŭ aktyvista kanfiskavali. U znak pratestu suprać pryhavoru Rubcoŭ abjaviŭ haładoŭku.
Viečaram 21 maja, paśla zakančeńnia terminu aryštu, Rubcova z centra izalacyi pravaparušalnikaŭ advieźli na čyhunačny vakzał Minska i pasadzili na ciahnik da Homiela, adnak paśla pryjezdu tudy jon znoŭ byŭ zatrymany. 22 maja sud Čyhunačnaha rajona Homiela pryhavaryŭ jaho na piać sutak aryštu nibyta za niepadparadkavańnie supracoŭnikam milicyi i niecenzurnuju łajanku ŭ hramadskim miescy. Rubcoŭ znoŭ abjaviŭ haładoŭku.
Takim čynam, haładoŭka pratestu homielskaha aktyvista ciahnułasia 30 sutak.
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam24
Kamientary