Navukoŭcy: pieršyja žyvioły na Ziamli byli vielmi drennyja ŭ seksie

Na praciahu miljonaŭ hadoŭ žyćcio na našaj płaniecie isnavała ŭ vielmi pavolnym tempie. Pieršyja žyvioły, jakija nasialali akijany bolš za paŭmiljarda hadoŭ tamu, amal nie źmianialisia z pakaleńnia ŭ pakaleńnie. Novaje daśledavańnie navukoŭcaŭ z Kiembrydžskaha ŭniviersiteta, na jakoje źviartaje ŭvahu BBC Science Focus, tłumačyć pryčyny.

Kamanda daśledčykaŭ praanalizavała znojdzienyja na vostravie Ńjufaŭndlend akamianiełaści najstarejšych ź viadomych žyvioł na Ziamli, jakija žyli kala 574 miljonaŭ hadoŭ tamu ŭ edyjakarski pieryjad (pamiž 635 i 539 miljonami hadoŭ tamu).

Na padstavie hetych danych jany stvaryli kampjutarnuju madel, jakaja pakazała, čamu na praciahu mnohich miljonaŭ hadoŭ kolkaść vidaŭ zastavałasia adnosna nievialikaj. Hetyja istoty razmnažalisia biaspołym šlacham, stvarajučy patomstva na asnovie hienaŭ tolki adnaho z baćkoŭ.

Adnymi z najbolš charakternych pradstaŭnikoŭ taho času byli fraktafususy (Fractofusus), jakija choć i nahadvali vonkava liście paparaci, pavodle svajoj pryrody ŭžo byli składanymi arhanizmami. Jany nie mieli kancavin ci orhanaŭ stravavańnia i atrymlivali pažyŭnyja rečyvy niepasredna z vady. Ale hałoŭnaj ich asablivaściu byŭ sposab razmnažeńnia.

Pavialičyć

Jak vyśvietlili daśledčyki, hetyja staražytnyja arhanizmy byli vyklučna biaspołymi. Jany stvarali hienietyčnyja kopii samich siabie, vypuskajučy śpiecyjalnyja adrostki, — nakštałt taho jak razmnažajucca sučasnyja sadovyja sunicy. U toj pieryjad takaja stratehija była apraŭdanaj.

«Žyćcio ŭ edyjakarski pieryjad było davoli pryjemnym i spakojnym, tamu patreba ŭ seksie była vielmi abmiežavanaj. Kankurencyja była adnosna słaboj, tamu nie było realnaha evalucyjnaha cisku, jaki b prymušaŭ štości źmianiać», — tłumačyć viadučy aŭtar daśledavańnia doktar Emili Mitčeł z kafiedry zaałohii Kiembrydžskaha ŭniviersiteta.

Situacyja źmianiłasia, kali arhanizmy pačali zasialać prybiarežnyja vody. Tam im daviałosia sutyknucca z prylivami, štormami, vahańniami tempieratury, źmianieńniem kolkaści pažyŭnych rečyvaŭ i ŭsio bolšaj kankurencyjaj.

Jak tłumačyć Mitčeł, mienavita hetaje stresavaje asiarodździe prymusiła žyvy śviet pierajści da pałavoha razmnažeńnia. Heta dazvoliła arhanizmam stvarać bolš hienietyčna raznastajnaje patomstva, chutčej prystasoŭvacca da novych umoŭ i asvojvać novyja terytoryi.

U adroźnieńnie ad kłanavańnia pałavoje razmnažeńnie dazvalała źmiešvać hieny i chutka adaptavacca da źmienlivych umoŭ. Heta pryviało da rostu kankurencyi, što, u svaju čarhu, prymusiła vidy raśsialacca na bolš dalokija adlehłaści ŭ pošukach novych niš.

Pa miery taho jak hetyja žyvioły adaptavalisia da novych asiarodździaŭ pražyvańnia i novych sposabaŭ razmnažeńnia, pačała raści i vidavaja raznastajnaść. Hety praces jašče bolš paskoryŭsia ŭ nastupny, kiembryjski, pieryjad, kali žyvioły zdabyli zdolnaść aktyŭna ruchacca.

• 2
• 0
• 0
• 0
• 0
• 0
• 0
• 0