Tymčuk: Kiepskija i dobryja naviny z Ukrainy za 16 červienia

Braty i siostry, pa vynikach 16 červienia.

 Z drennaha:

 1. My nie znajšli na zajaŭlenym kirunku ŭ Rastoŭskaj vobłaści RF bujnoj kałony bronietechniki rasijskich vojskaŭ kala miažy z Ukrainaj

(pa infarmacyi ŚMI, jana ruchałasia da pamiežnaha punkta «Daŭžanski»).

 Ale my vyjavili pierakidku rasijskich padraździaleńniaŭ da miažy na poŭnač ad «Daŭžanskaha».

 Raniej situacyja na miažy z RF i paśla advodu značnaj častki rasijskich vojskaŭ nie stała mienš napružanaj. Naadvarot: patoki najmitaŭ i zbroi z Rasii stali ščylniejšymi. Ciapier da hetaha viartajecca i raniejšaja pahroza poŭnamaštabnaha ŭvarvańnia armii Rasii.

 2. Ź siońniašniaha dnia Rasija całkam spyniła pastaŭki hazu va Ukrainu,

— jak paviedamiŭ ministr enierhietyki Ju. Prodan, zastaŭsia tolki abjom tranzitu hazu, jaki idzie ŭ Jeŭropu. Premjer A. Jacaniuk daručyŭ Ministerstvu enierhietyki i Miniustu padrychtavać zakonaprajekt ab nadzvyčajnym stanoviščy ŭ enierhietycy.

 Ničoha dobraha heta nie aznačaje ni dla nasielnictva, ni dla pradpryjemstvaŭ (a značyć, ekanomiki Ukrainy ŭ cełym). Heta — tradycyjnaja z boku Maskvy «hazavaja vajna», jakoj zaraz RF vyrašyła padmacavać svajo vajennaje ŭvarvańnie ŭ Ukrainu.

 Pazityŭ tolki ŭ tym, što ciapier Ukraina, chaj vymušana, i niachaj z surjoznymi prablemami, ale budzie vyrašać toje pytańnie, jakoje pavinna była vyrašyć jak minimum pry Juščanku. A mienavita — pazbavicca ad «siabroŭskich» hazavych abdymkaŭ Rasii.

 Bo ŭsio dobra razumieli, što hetyja abdymki ničoha dobraha dla našaj krainy nie značać. Ale abdymacca ad hetaha my praciahvali ź nie mienšaj asałodaj. Na žal.

 3. Jak paviedamiŭ siońnia prezident Ukrainy P.Parašenka, ukrainskija siłaviki ŭžo kantralujuć bolš za 250 kiłamietraŭ dziaržmiažy z Rasijaj.

 Parašenka, ja tak razumieju, aptymist. Jon bačyć napałovu poŭnuju šklanku. Ja, na žal, piesimist — ja baču napałovu pustuju. A dakładniej — toje, što sotni kiłamietraŭ dziaržmiažy zastajucca bieskantrolnymi. Tut rasiejcy razam z našymi rodnymi terarystami robiać, što chočuć.

 Da kanca tydnia Parašenka abiacaje pierakryć usiu miažu. Prapanuju radavacca tolki pa fakcie.

 4. Siońnia ŭ Viarchoŭnaj Radzie A.Laško abvinavaciŭ lidera frakcyi Partyi rehijonaŭ A.Jafremava ŭ tym, što apošni lotaje ŭ Maskvu atrymlivać instrukcyi ad Kramla.

 Jafremaŭ vykrutliva adkazaŭ: maŭlaŭ, jaho vizit byŭ publičnym, «heta byŭ udzieł u kruhłym stale, była tranślacyja, i ŭ hetym niama ničoha sakretnaha». Treba mierkavać, Jafremaŭ namiakaje, što štosiekundna znachodziŭsia ŭ prycele telekamier, u tym liku pry naviedvańni tualeta, ci dzie jašče jon instrukcyi ad Pucina atrymlivaŭ.

 Rehijanał ŭ Maskvie — jak dzicia na vulicy. Tolki advierniešsia, dzicia imkniecca jakuju-niebudź hadaść ŭ rot zasunuć, a rehijanał — instrukcyju ad FSB u kišeniu. Ź vialikaj roźnicaj: dzicia taki dziejničaje nieśviadoma i nie škodzić adrazu cełaj krainie. Nu i nie atrymlivaje ź dziaržbiudžetu zarpłaty-matdapamohu-kvatery-lhoty za svaje hadaści.

 U lubym vypadku, čas idzie, a našy pravaachoŭniki tak i nie śpiašajucca dać acenku dziejnaści niekatorych znakamitych palitykaŭ, vidavočna jakija hrajuć na baku kamandy chłopčyka Vovy.

 Z dobraha:

 1. Na pasiadžeńni SNBA P.Parašenka ahučyŭ asnoŭnyja punkty svajho płana na bližejšuju pierśpiektyvu.

Tak zvany «mirny płan» prezidenta składajecca ŭ spynieńni ahniu na Danbasie da kanca tydnia.

 Ja, jak i vy, pačuŭšy padobnuju prapanovu, spačatku ad dušy maciuknuŭsia — stvaryłasia ŭražańnie, što ATA «źlivajuć», razam z Danbasam. Ale varta było dasłuchać Parašenku da kanca.

 Sens, spadziajusia, zrazumieły: dla pačatku pierakryć miažu z Rasijaj (kab usia hetaja pucinskaja brydota pierastała leźci va Ukrainu), a zatym dać mahčymaść terarystam skłaści zbroju. Chto nie schavaŭsia, pardon, nie zdaŭsia — siłaviki nie vinavatyja.

 Płan dobry. Ź dźviuma ŭmovami: kali miaža sapraŭdy budzie nadziejna pierakrytaja, i kali na čas spynieńnia ahniu miescy baziravańnia bajevikoŭ pa ŭsim Danbasie buduć błakavanyja (nie jak u Słaviansku). Biez vykanańnia hetych umoŭ płan sensu nie maje.

 2. Užo niekalki dzion idzie pierafarmatavańnie ATA.

Ja nie mahu skazać, nakolki «novy farmat» budzie bolš efiektyŭny za toj, što my bačyli da hetaha času — žyćcio vučyć aceńvać pa vynikach. Bo na słovach u našych hienierałaŭ zaŭsiody ŭsio dobra.

 Ale, padobna, prychod da ŭłady lehitymnaha prezidenta taki abudziŭ ad śpiački našych stratehaŭ — pačali varušycca. Tolki b z karyściu dla spravy.

 3. I jašče raz ab dziaržaŭnaj miažy.

U apošnija dni praces błakavańnia miažy z RF pravodzić užo pa sutnaści inšaja Dziaržpamiežsłužba. Jašče nie całkam abnoŭlenaja, ale — u pracesie.

 Užo pracujuć novyja motamanieŭranyja hrupy. U bajach z terarystami pamiežniki adpracoŭvajuć ciesnaje ŭzajemadziejańnie z armijaj. Navučalny centr Dziaržpamiežsłužby pačynaje padrychtoŭku śpiecyjalistaŭ pa «vajennych» śpiecyjalnaściach — jakija zapatrabavanyja mienavita dla vajenizavanaj achovy miažy.

 Heta — niesumnienny pazityŭ. Ukrainie nie spać spakojna, pakul miaža z Rasijaj nie «na zamku».

• 0
• 0
• 0
• 0
• 0
• 0
• 0
• 0