Brytaniec z padazreńniem na chantavirus vysadziŭsia na samy addaleny vostraŭ śvietu. Łondan adpraviŭ jamu na dapamohu miedykaŭ-parašutystaŭ

Vajskovyja miedyki brytanskaj armii desantavalisia na parašutach na addaleny vostraŭ Trystan-da-Kuńja ŭ Atłantyčnym akijanie, kab akazać dapamohu hramadzianinu Vialikabrytanii z padazreńniem na chantavirus, piša Bi-bi-si.

Mužčyna pakinuŭ kruiznaje sudna MV Hondius, na borcie jakoha ŭ siaredzinie krasavika adbyłasia ŭspyška virusa. Jon viarnuŭsia na Trystan-da-Kuńju, dzie hety čałaviek žyvie.

Hety archipiełah u paŭdniovaj častcy Atłantyčnaha akijana — samaja addalenaja brytanskaja zamorskaja terytoryja. Naroŭni z vostravam Vialikadnia, jon taksama źjaŭlajecca samaj addalenaj ad macierykoŭ terytoryjaj śvietu z pastajannym nasielnictvam.

Na Trystan-da-Kuńji pražyvaje 221 hramadzianin Vialikabrytanii. Aeradroma tam niama, tamu dabracca na jaho možna tolki pa mory.

Ale ŭ hetym vypadku hety varyjant nie padychodziŭ, pakolki ŭ chvoraha zakančvalisia zapasy kisłarodu, raspavioŭ Bi-bi-si kaardynatar apieracyi Ed Kartrajt, kamandujučy 16‑j desantna-šturmavoj bryhadaj.

Što viadoma pra chvoraha

Pieršyja simptomy ŭ jaho źjavilisia praz dva tydni paśla vysadki z sudna. Paviedamlajecca, što stan mužčyny zastajecca stabilnym, jon samaizalujecca.

SAAZ paćvierdziła šeść vypadkaŭ zaražeńnia chantavirusam, a taksama jašče dva mierkavanych vypadki — uklučajučy brytanca na Trystan-da-Kuńji. Dvoje brytancaŭ z paćvierdžanym dyjahnazam prachodziać lačeńnie ŭ Niderłandach i Paŭdniovaj Afrycy.

Kruizny łajnier MV Hondius 1 krasavika adpraviŭsia ŭ kruiz z Arhienciny da Antarktydy. U vyniku ŭspyški zachvorvańnia na borcie pamierli try čałavieki — pažyłaja para sužencaŭ ź Niderłandaŭ i hramadzianka Hiermanii.

U subotu z brytanskaha samalota RAF A400M na vostraŭ taksama skinuli kisłarod, pakolki jaho zapasy tam znachodzilisia na «krytyčna nizkim uzroŭni», paviedamili ŭ Ministerstvie abarony Vialikabrytanii.

Chantavirus — heta hrupa virusaŭ, pieranosčykami jakich źjaŭlajucca hryzuny. Bolšaść raznavidnaściaŭ nie pieradajucca ad čałavieka da čałavieka, adnak heta mahčyma ŭ vypadku źjaŭleńnia andskaha štamu, jaki byŭ vyjaŭleny ŭ niekalkich pasažyraŭ niderłandskaha kruiznaha sudna.

Pa danych Suśvietnaj arhanizacyi achovy zdaroŭja (SAAZ), brytaniec, jaki pražyvaje na Trystan-da-Kuńji, pakinuŭ sudna 14 krasavika.

28 krasavika ŭ jaho źjaviłasia dyjareja, a praz dva dni — tempieratura. Zaraz jon znachodzicca ŭ stabilnym stanie.

Na archipiełah Trystan-da-Kuńja byli desantavanyja šeść vajskoŭcaŭ-desantnikaŭ i dvoje miedykaŭ z 16‑j desantna-šturmavoj bryhady.

Vajenna-transpartny samalot RAF A400M pry padtrymcy samalota-zapraŭščyka RAF Voyager vylecieŭ z bazy Brajz-Nortan u Oksfardšyry na vostraŭ Uźniasieńnia ŭ paŭdniovaj Atłantycy, a zatym nakiravaŭsia da Trystan-da-Kuńji.

Dvoje desantnikaŭ skoknuli razam ź lekaram intensiŭnaj terapii i miedsiastroj reanimacyi, jakija buduć dapamahać miascovaj sistemie achovy zdaroŭja — zvyčajna na vostravie pracujuć tolki dva miedyki.

Pa słovach Eda Kartrajta, desantnikam pryjšłosia vykonvać «nadzvyčaj składany techničny skačok» z-za mocnaha vietru i nievialikich pamieraŭ vostrava. Jak paviedamili ŭ Minabarony, siaredniaja chutkaść vietru na vostravie časta pieravyšaje 40 km/h.

Bryhadzir Kartrajt raspavioŭ, što desantavańnie adbyvałasia z vyšyni kala 5 km nad paŭdniovaj Atłantykaj, paśla čaho parašutysty raźviarnulisia pa vietry, pralacieli nazad nad vostravam i ździejśnili pasadku na jaho ŭskrainie.

«Pamyłka ŭ takoj situacyi aznačała b, što vy apynieciesia ŭ Atłantyčnym akijanie», — dadaŭ jon.

Pieršy padobny vypadak

Pa danych Minabarony Brytanii, heta pieršy vypadak, kali brytanskija vajennyja desantavali miedycynski piersanał dla akazańnia humanitarnaj dapamohi.

Pasadka adbyłasia na poli dla holfa, havorycca na sajcie miascovych uładaŭ. Ułady taksama paviedamili, što dla miascovaj balnicy było dastaŭlena 3,3 tony miedycynskich pryład.

Kartrajt adznačyŭ, što apieracyja była nakiravana nie tolki na dapamohu mužčynu z padazreńniem na chantavirus, ale i na padtrymku astatnich žycharoŭ vostrava, asabliva tych, chto moh kantaktavać ź im.

Ministr pa spravach uzbrojenych sił Eł Karns adznačyŭ, što apieracyja prachodziła ŭ «nadzvyčaj składanych umovach». «Ja chaču vykazać vielizarnuju ŭdziačnaść našym vajskoŭcam za toje, što jany vykanali zadaču z maksimalnym prafiesijanalizmam i vytrymkaj u ciažkich umovach», — dadaŭ jon.

Bryhadzir Kartrajt paviedamiŭ, što desantnikaŭ paźniej evakujujuć z vostrava na karabli. Pavodle jaho słoŭ, hety praces staranna płanujecca «z ulikam miedycynskaj situacyi».

• 4
• 0
• 1
• 0
• 1
• 0
• 0
• 0