Toje, što vizyt anansavany jak dvuchdzionny, daje padstavy mierkavać: kramloŭski kiraŭnik zavitvaje ŭsio ž nia dziela ptušački. Piša ŭ svaim błohu Alaksandar Kłaskoŭski.
U Miensk źbirajecca Pucin. Nie "kalektyŭny", a toj samy, pra jakoha niekali Zachad pytaŭsia "Who is?..". Bolej užo nie pytajecca.
Miarkujecca pravieści pasiadžeńje Najvyšejšaje rady sajuznaje dziaržavy, zaćvierdzić jejny biudžet na nastupny hod. Suma hetaha biudžetu, jak zaŭvažyŭ naš ekanamist Leanid Zaika, mienšaja, čym "zazor u hazavym taryfie". Zrazumieła, što naziralnikaŭ značna bolej cikavić imaviernaja zakulisnaja intryha.
Raniej hučali hipotezy, što pad zasłonu svajho prezydenctva Pucin pasprabuje dacisnuć upartaha partnera, vyrašyć ci pieradvyrašyć "biełaruskaje pytańnie" ŭ patrebnym Kramlu klučy.
"Nia dumaju, što za adzin vizyt možna vyrašyć usie pytańni, — padzialiŭsia sa mnoj mierkavańniem palitolah Valer Karbalevič. — Uvohule ž vyhladaje na toje, što apošnim časam Maskva hatovaja rabić niejkija kroki nasustrač Miensku". U pryvatnaści, hučać prazrystyja namioki, što cana hazu moža akazacca davoli łahodnaj. To bok ustalavanaj pavodle palityčnaj formuły, kaža ekspert.
Jon ličyć, što takaja łahodnaść tłumačycca, najchutčej, niežadańniem hazavaj vajny ŭ elektaralny peryjad, a taksama namieram prademanstravać Zachadu, ź jakim Kreml zaraz napalaje stasunki: maŭlaŭ, my nie zabyvajem pra svoj stratehičny placdarm!
Pakul što Alaksandar Łukašenka nie padtrymlivaje zajavy maskoŭskich kołaŭ pra "asymetryčny adkaz" ZŠA pry dapamozie Biełarusi. U pryvatnaści, na pytańnie karespandentki "Pais", suprać kaho buduć skiravanyja "Iskandery" na našaj terytoryi, biełaruski kiraŭnik adkazaŭ: "Ni suprać kaho. Heta nie stratehičnyja ŭzbrajeńni, a bolej mahutnyja abarončyja systemy".
Darečy, padrabiazny pierakaz hetaha interviju z mnostvam cytataŭ možna znajści tut. Detalova analizavać tekst nia budziem, bo tut mała novaha ŭ paraŭnańni z tym, što hučała sioleta ŭ hutarkach z karespandentami "Velt", "Rojterz", "Mond".
Što ž da zhadak pra Pucina, to, z adnaho boku, Łukašenka paškadavaŭ, što toj sychodzić, a ź inšaha boku — prahučała, što rasiejski kiraŭnik "dušyć Biełaruś" cenami na enerhanośbity i, mahčyma, nia mocny ŭ arytmetycy, kažučy pra subsydyi.
Ci stanie Pucin "dušyć" mienavita zaraz? Va ŭsiakim razie, na ciahnik prezydenta sajuznaje dziaržavy jon nie paśpiavaje, navat kali ŭjavić sabie, što damoviacca pra referendum. Dyj raniej hety varyjant vyhladaŭ efemerna. Ale toje, što vizyt anansavany jak dvuchdzionny, daje padstavy mierkavać: kramloŭski kiraŭnik zavitvaje ŭsio ž nia dziela ptušački. Trochi pačakajem…
Kali ž kazać pra "kalektyŭnaha Pucina", to pry luboj kanfihuracyi rasiejskaj ułady paśla 2 sakavika 2008 hodu budzie doŭžycca dy ŭzmacniacca presynh na biednuju enerharesursami Biełaruś ź jaje praktyčna nie refarmavanaj, nie hatovaj da vyklikaŭ hlabalizacyi ekanomikaj.
Ciapier čytajuć
Biełarusaŭ pa viartańni damoŭ na miažy ŭsio čaściej raździavajuć dahała10
Biełarusaŭ pa viartańni damoŭ na miažy ŭsio čaściej raździavajuć dahała
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2727
Kamientary