Fizičnyja knopki viartajucca? Aŭtavytvorcy pačynajuć admaŭlacca ad sensaraŭ i vializarnych ekranaŭ

Nahulalisia i chopić?

Stała viadoma, što niamiecki brend Audi pryznaŭ pamyłkovaj papiaredniuju stratehiju pa pieravodzie amal usich ryčahoŭ kiravańnia aŭto na sensarnyja ekrany abo paneli.

Pra heta aŭstralijskamu vydańniu GoAuto zajaviŭ techničny dyrektar marki Ruvien Mor. Heta aznačaje, što ŭ novych madelach vytvorca viernie fizičnyja knopki i pieraklučalniki, ad jakich raniej aktyŭna admaŭlaŭsia, a vielizarnyja ekrany zamieniać bolš kampaktnymi.

U Audi da takoha rašeńnia pryjšli praz toje, što bolšaści ludziej, pierš za ŭsio ŭ Jeŭropie, Paŭnočnaj Amierycy i Aŭstralii, novy padychod da dyzajnu i azdableńnia interjera akazaŭsia niedaspadoby.

Reč u tym, što ŭ svaich apošnich madelach Aŭdzi amal całkam admoviłasia ad fizičnych knopak: kiravańnie klimat-kantrolem, jak i šmatlikimi inšymi funkcyjami, pierajšło na sensarny ekran.

Sensarnymi stali knopki ŭklučeńnia avaryjki, kiravańnia lusterkami, śviatłom, abahrevam siadzieńniaŭ i hetak dalej.

Pavialičyć

Fizičnyja knopki źnikli z kiravańnia na styrnie, što časam pryvodzić da vypadkovych naciskańniaŭ padčas kiravańnia aŭto.

Aproč hetaha, u Audi admoviacca ad pieratvareńnia paneli aŭtamabila ŭ adzin vialiki płanšet, jak heta možna nazirać na novaj Audi Q7.

Pavialičyć

Pry hetym varta razumieć, što praces admovy ad zališniaj sensaryzacyi nie budzie rezkim, a zojmie bližejšyja dva hady. Pieršaj madellu Audi, kudy viernucca fizičnyja knopki, a ekranaŭ stanie mienš, musić stać novaja Audi A4 e-tron.

Nie tolki Audi pierahladajuć padychod

VW, jaki całkam admoviŭsia ad fizičnych knopak u 2022 hodzie, taksama prysłuchaŭsia da spažyŭcoŭ i pačaŭ viartać fizičnyja knopki kiravańnia na styrnie, klimat-kantroli i multymiedyja ŭ svaich novych madelach.

«My bolš nie paŭtorym toj ža pamyłki. Knopki na rulavym kole viernucca da fizičnaha dyzajnu, kab karystalniki mahli kiravać funkcyjami nie hledziačy. Fizičnyja knopki majuć zvarotnuju suviaź, heta zručna. Urešcie, havorka idzie pra aŭtamabil, a nie smartfon», — kazaŭ u 2025 hodzie dyrektar pa dyzajnie Volkswagen Andreas Minter, kali kamientavaŭ viartańnie nazad fizičnych elemientaŭ kiravańnia asnoŭnymi funkcyjami.

Pavialičyć

Tamu novy VW ID Polo vyjšaŭ ź fizičnymi knopkami kiravańnia na styrnie, viarnułasia fizičnaje kiravańnie klimat-kantrolem, hukam, lusterkami i inšymi funkcyjami.

Japonski aŭtavytvorca Subaru sutyknuŭsia ź niehatyŭnymi vodhukami kupcoŭ i viarnuŭ tradycyjnuju madel kiravańnia klimat-kantrolem u novy Outback siomaha pakaleńnia 2026 madelnaha hoda.

Vialiki ekran — bolš nie prykmieta raskošy

Usumnilisia ŭ nieabchodnaści pieratvarać panel aŭtamabila ŭ adzin vialiki ekran i ŭ Mercedes-Benz. Jašče letaś hałoŭny dyzajnier niamieckaha brenda Horden Vahienier u intervju ABC News vykazaŭsia, što ekrany — heta bolš nie raskoša, pakolki ŭ 2025 hodzie vielizarnyja dysplei stali standartam navat u biudžetnych aŭto.

«Usie kankurenty abstalavanyja vialikimi ekranami — u hetym niama ničoha ekskluziŭnaha. My pavinny šukać raskošu ŭ inšym: u majsterstvie vykanańnia i vytančanaści detalaŭ», — zajaviŭ Vahienier.

Pavialičyć

I heta pry tym, što raniej Mercedes-Benz rabiŭ staŭku na vielizarnyja ekrany, ale jašče letaś u kampanii pryznali, što technałahičny vaŭ-efiekt bolš nie pracuje.

Niekatoryja nie paddalisia trendu

Tym nie mienš daloka nie ŭsio aŭtavytvorcy vyrašyli admovicca ad fizičnych knopak i zamianili ich vialikimi multymiedyjnymi sensarnymi ekranami.

Tak, naprykład, u kampanii Alfa Romeo zajavili, što nie majuć namieru ŭstaloŭvać šyrokafarmatnyja dysplei i pierahružać aŭtamabili lišnimi funkcyjami.

Kiraŭnik Alfa Romeo raspavioŭ, što kampanija praviała ŭłasnaje daśledavańnie, pa vynikach jakoha vyśvietliłasia, što klijentam brenda nie patrebnyja šyrokafarmatnyja dysplei na piaredniaj paneli aŭtamabila.

Pavialičyć

Kampanija Hyundai taksama zajaviła, što pry prajektavańni aŭtamabilnych elemientaŭ kiravańnia budzie addavać pieravahu knopkam i cyfierbłatam. Testavańnie ŭ fokus-hrupie pakazała, što sensarnyja ekrany razdražniajuć kiroŭcaŭ.

Kampramis znojdzieny?

Jaki łahier u vyniku stanie pieramožcam u baraćbie pamiž fizičnymi knopkami i tačskrynam, pakul nieviadoma. Ale vyhladaje, što niekatoryja aŭtavytvorcy znajšli kampramisny varyjant.

Tak, naprykład, kampanija Xiaomi, jakaja tolki ŭ kancy 2023 hoda prezientavała svoj pieršy aŭtamabil, prapanuje fizičnyja knopki dla kiravańnia klimat-kantrolem i multymiedyja ŭ jakaści dadatkovaha abstalavańnia.

Pavialičyć

Dadatkovyja knopki možna budzie nabyć asobna, panel macujecca da nižniaha kraju centralnaha ekrana.

Moda na ekrany i sensary VS biaśpieka

Sensarnyja ekrany patrabujuć ad kiroŭcy pieravodu pohladu z darohi na ekran, u toj čas jak na aŭtamabilach ź fizičnymi knopkami i kruciołkami kiravańnie bolšaściu funkcyj ažyćciaŭlajecca navobmacak. 

Daśledavańnie šviedskaj kampanii Vi Bilägare, praviedzienaje jašče ŭ 2022 hodzie, pakazała, što dla aktyvacyi anałahičnych funkcyj na aŭto z tačskrynam spatrebicca amal u dva z pałovaj razy bolš času, čym na aŭtamabilach biez sensarnych panelaŭ.

Daśledavańnie Univiersiteta Vašynhtona i Toyota Research Institute praviedzienaje ŭ 2025 hodzie pakazała, što sensarnyja ekrany ŭ aŭtamabilach niehatyŭna ŭpłyvajuć na kiravańnie i reakcyju kiroŭcaŭ.

Navat prostyja dziejańni na dysplei pavialičvajuć adchileńni ŭ pałasie na 42%. Dakładnaść i chutkaść naciskaŭ na dysplei pry hetym źnižalisia na 58%, a pry vysokaj razumovaj nahruzcy — jašče na 17%.

• 5
• 0
• 0
• 1
• 0
• 0
• 0
• 0