Biełaruskija pravaabaroncy zaklikajuć kaleh, siabroŭ i adnadumcaŭ dałučycca da kampanii ŭ padtrymku hramadzianskaha aktyvista Paŭła Vinahradava.
Dvaccacišaścihadovy Vinahradaŭ — adzin ź fihurantaŭ kryminalnaj spravy ab masavych biesparadkach u Minsku 19 śniežnia 2010 hoda, byŭ asudžany na čatyry hady kałonii ŭzmocnienaha režymu, vyzvaleny na padstavie ŭkaza Alaksandra Łukašenki ab pamiłavańni. Zaraz aktyvist maładziožnaha kryła «Zmiena» kampanii «Havary praŭdu» znachodzicca pad aryštam. 9 kastryčnika sud Maskoŭskaha rajona Minska čarhovym razam pryhavaryŭ jaho da 15 sutak administracyjnaha aryštu za drobnaje chulihanstva.
Pravaabaroncy, jak paviedamiŭ namieśnik staršyni likvidavanaha ŭładami pravaabarončaha centra «Viasna» Valancin Stefanovič 15 kastryčnika na pres-kanfierencyi ŭ Minsku, zafiksavali 16 vypadkaŭ zatrymańnia Vinahradava paśla vyzvaleńnia z kałonii. Piatnaccać ź ich zakončylisia administracyjnymi aryštami ad 5 da 25 sutak, što sumarna składaje 165 sutak — faktyčna piać z pałovaj miesiacaŭ. Ź ich na hety hod, uklučajučy ciapierašni aryšt, vypali 65 sutak źniavoleńnia.
Pavodle słoŭ Stefanoviča, «prykład Vinahradava źjaŭlajecca śviedčańniem represiŭnaści ŭładaŭ u dačynieńni da inšadumcaŭ, a taksama paćviardžaje pravavuju niespraviadlivaść u biełaruskaj dziaržavie».
«Mianie zaŭsiody ŭražvaje, nakolki Pavieł čałaviek viasioły i pazityŭny, niahledziačy na toje što faktyčna žyvie ŭ turmie. Nie razumieju, jak jon usio heta vytrymlivaje, — skazaŭ Stefanovič. — Toje, što adbyvajecca vakoł Vinahradava, śviedčyć pra karoziju sudovaj sistemy Biełarusi. Mnie vielmi soramna za hetych ludziej, za toje, što jany robiać».
Pravaabaronca źviarnuŭsia da hramadskaści z prośbaj padtrymać zaklik da spynieńnia advolnych zatrymańniaŭ u Biełarusi.
Kab dałučycca da kampanii, paviedamiŭ Stefanovič, možna sfatahrafavacca z partretam Vinahradava i vykłaści zdymak u sacyjalnych sietkach; vykazać svajo mierkavańnie nakont hetaj prablemy; zapisać videa ŭ padtrymku aktyvista i vykłaści jaho ŭ sacsietki z teham #freeVinagradau; dasłać jamu paštoŭku salidarnaści ŭ Centr izalacyi pravaparušalnikaŭ u Minsku.
Ciapier čytajuć
Alaksandr Nadsan pieršy raz pryjechaŭ u Biełaruś paśla saraka hadoŭ emihracyi. Minskaja moładź niečakana znajšła ŭ im toje, čaho nie bačyła ŭ svaich baćkach66
Kamientary