Nastaŭnicam nie rekamiendavali chadzić biez kałhot

Nastaŭniki z Bresta atrymali ad administracyi artykuł eks-deputata Uładzimira Zdanoviča hadavoj daŭniny. U im jon raić nastaŭnikam nie apranać u škołu abcasy vyšej za 6 santymietraŭ z adkrytaj piatkaj, boty vyšej za kalena, cyhanskija ci džynsavyja spadnicy.

Taksama były deputat, a siońnia čynoŭnik Minadukacyi nie raić nastaŭnikam jarki makijaž, daŭhija paznohci i vałasy. Na razdrukavanym artykule, dasłanym u niekatoryja škoły Bresta, ałoŭkam napisana, kab parady raspaŭsiudzili siarod nastaŭnikaŭ. 

U rekamiendacyjach u pryvatnaści havorycca:

Adzieńnie:

«Ličycca nieprystojnym vieści ŭrok u džynsach; spartyŭnaj vopratcy (za vyklučeńniem nastaŭnikaŭ fizičnaj kultury i zdaroŭja, rytmiki i da t.p.); vopratcy z machrami, bliščynkami, karunkami, vialikimi jarkimi huzikami, u vopratcy, što pakidaje adkrytaj vobłaść žyvata, mini-spadnicy, spadnicy ź vialikim razrezam, u błuzcy, što praśviečvajucca, abo błuzcy ź vielmi hłybokim dekalte; ponča i padobnych jamu biasformavych nakidkach; «cyhanskich» spadnicach i h.d. Adzieńnie dla škoły (himnazii, liceja) nie pavinna być zanadta ŭ abciažku i z vyklikam jarkich koleraŭ. Nie dapuskajucca kałhotki i pančochi ŭ bujnuju sietku, kletku abo ŭ kvietačku. Hołyja nohi, niachaj i vielmi pryhožyja, taksama nie vitajucca, navat u vielmi śpiakotnaje nadvorje».

Abutak:

«Dziełavy styl taksama nie prymaje krasoŭki (znoŭ ža za vyklučeńniem nastaŭnikaŭ fizičnaj kultury i zdaroŭja), słancy i luby abutak ź niezakrytaj piatkaj, adkrytyja basanožki, boty vyšej kalena. Abutak pavinien być strohich kłasičnych form, na nievysokim ŭstojlivym abcasie (nie vyšej za 6 sm), ni ŭ jakim razie nie masiŭny i nie krochki».

Pryčoska, makijaž, manikiur, upryhožańni:

«Pryčoska abo ŭkładka pavinny pakidać adkrytym tvar, bo, pa-pieršaje, hladziacca akuratniej, i, pa-druhoje, adkryty tvar vyklikaje bolš davieru. Zanadta doŭhija raspuščanyja vałasy, afrykanskija kasički, dredy — usio heta taksama nie dla školnaha nastaŭnika.

Makijaž pavinien być niakidkim i lohkim.

U manikiury varta paźbiahać dźviuch krajnaściej: niedahledžanych abo zanadta doŭhich i jarkich paznohciaŭ. Upryhožańni nie pavinny bliščać, być hruvastkimi, źvinieć, usie hetyja faktary buduć adciahvać vučniaŭ ad sutnaści materyjału. Tradycyjna ličycca, što pavinna być nie bolš za try ŭpryhažeńni.

U zaklučeńni čynoŭnik adznačaje: «Patrabavańnie da vyhladu piedahahičnych rabotnikaŭ nie pavinna pieratvarycca ŭ imknieńnie apranuć usich adnolkava, a ŭžo tym bolš u ckavańnie asobnych nastaŭnikaŭ abo ich prynižeńnie z boku administracyi. U hetym tonkim i vielmi dalikatnym pytańni hałoŭnaje — vykanać takt, uličvać usie niuansy taho ci inšaha ŭčynku i asablivaści žyćcia čałavieka, u tym liku jaho materyjalnyja mahčymaści».

Ministerstva adukacyi nazyvaje razasłany ŭ Breście materyjał Zdanoviča jaho asabistym mierkavańniem. «Materyjał mahli razasłać, kab nastaŭniki prosta aznajomilisia», — adkazvajuć u viedamstvie. I dadajuć, što pa zakonie strohich praviłaŭ, jak apranacca nastaŭnikam, niama.

• 0
• 0
• 0
• 0
• 0
• 0
• 0
• 0