Siarhiej Skrabiec: «Heta redki byŭ čałaviek, biassrebranik»
«Valeryj Frałoŭ byŭ ščyrym siabram i čałaviekam, viernym svaim ideałam»,
— adznačyŭ palityk Siarhiej Skrabiec z nahody śmierci hienierała.
U 2000—2004 hadach Frałoŭ i Skrabiec byli deputatami pałaty pradstaŭnikoŭ Nacyjanalnaha schodu II sklikańnia, uvachodzili ŭ apazicyjnuju deputackuju hrupu «Respublika». U červieni 2004 hoda Valeryj Frałoŭ, Siarhiej Skrabiec i jašče adzin člen hrupy «Respublika» Uładzimir Parfianovič abjavili haładoŭku, patrabujučy ŭnieści źmieny ŭ Vybarčy kodeks, spynić palityčnyja represii i źmianić mieru strymańnia ŭ dačynieńni da kiraŭnika Biełaruskaj asacyjacyi «Dziełavaja inicyjatyva» Michaiła Maryniča, jaki tady ŭtrymlivaŭsia ŭ SIZA KDB.
«Heta redki byŭ čałaviek, biassrebranik, — uspaminaje Siarhiej Skrabiec. — Škada, što nie dažyŭ jon da śvietłaj budučyni. Usio maryŭ, pačynajučy jašče z pracy ŭ parłamiencie, palepšyć našaje hramadstva. Nie razumieŭ siońniašnich adnosinaŭ, kali ŭsio — za hrošy i čałaviek čałavieku — voŭk. Jon byŭ nie takim, zaŭsiody za ŭsich pieražyvaŭ, dapamahaŭ».
Skrabiec raskazaŭ, što sustrakaŭsia z Frałovym niekalki dzion tamu. «Ciažka pavieryć, što jon pamior. Niadaŭna bačylisia ź im, jon byŭ badziory i poŭny sił. My abmiarkoŭvali prezidenckuju kampaniju. Valeryj Ivanavič płanavaŭ vyłučać svaju kandydaturu. My pačali ŭžo źbirać inicyjatyŭnuju hrupu, byŭ płan dziejańniaŭ, sustreč i hetak dalej. Jon ža byŭ strateham, u jaho ŭsio było stroha pavodle płana», — skazaŭ Skrabiec.
Hienierał Frałoŭ pamior u Minsku 10 listapada na 68-m hodzie žyćcia. Jaho znajšoŭ miortvym u kvatery syn. Pavodle słoŭ syna, «dakładnaja pryčyna śmierci pakul nieviadomaja, ale pa źniešnich prykmietach skazali, što abo tromb, abo infarkt».
Ciapier čytajuć
Pratasievič znoŭ ženicca — ciapier z tarołaham Nastaśsiaj, jakaja pracavała ŭ elitnym miedcentry «Miersi»41
Kamientary