Previentyŭny nahlad nad Mikałajem Aŭtuchovičam padoŭžany na paŭhoda

Previentyŭny nahlad nad byłym palitźniavolenym Mikałajem Aŭtuchovičam praciahnuty na paŭhoda. Takoje rašeńnie 6 žniŭnia było pryniata na paŭtornym pasiadžeńni suda Vaŭkavyskaha rajona, jakoje adbyłosia biez udziełu Aŭtuchoviča, paviedamlaje pravaabarončy sajt spring96.org.

Mikałaj Aŭtuchovič

U siaredzinie lipienia sud Vaŭkavyskaha rajona nie zadavoliŭ chadajnictva miascovaha RAUS ab praciahu previentyŭnaha nahladu nad Aŭtuchovičam. Adnak nieŭzabavie na hetaje sudovaje rašeńnie vynies pryvatny pratest vykanaŭca abaviazkaŭ prakurora Vaŭkavyskaha rajona. Razhlad pratestu byŭ pryznačany na 6 žniŭnia, ale potym praces pieranieśli na dzień raniej.

Sudovaja kalehija Hrodzienskaha abłasnoha suda 5 žniŭnia admianiła rašeńnie suda Vaŭkavyskaha rajona, i sprava ab praciahu previentyŭnaha nahladu była adpraŭlena ŭ rajonny sud dla paŭtornaha razhladu 6 žniŭnia. Rašeńnie sudovaj kalehii ŭschvalavała Aŭtuchoviča, i ŭ jaho značna pavysiŭsia cisk, pačalisia hałaŭnyja boli. Ranicaj 6 žniŭnia byłomu palitźniavolenamu stała kiepska na pracy, jaho špitalizavali. U vyniku sud prajšoŭ u prysutnaści tolki advakata Aŭtuchoviča. Mikałaj Aŭtuchovič dahetul znachodzicca ŭ balnicy.

Juryst Pavieł Sapiełka ličyć, što nad byłymi źniavolenymi, jakija całkam i ŭ poŭnaj miery adbyli pakarańnie, ustanaŭlivać previentyŭny nahlad niapravilna, bo hetaja miera praduhledžvaje dadatkovyja surjoznyja abmiežavańni pravoŭ. «U dačynieńni da palitźniavolenych previentyŭny nahlad vykarystany ŭładami va ŭsioj krasie: niekatoryja z vyzvalenych palitźniavolenych byli asudžany za parušeńnie jaho praviłaŭ. Chtości, aścierahajučysia niezakonnaha asudžeńnia, pakinuŭ stalicu», — pryvodzić słovy Sapiełki sajt spring96.org.

Pradprymalnik z Vaŭkavyska, vieteran afhanskaj vajny, hramadski aktyvist Mikałaj Aŭtuchovič u krasaviku 2014 hoda vyjšaŭ na volu paśla bolš čym piaci hadoŭ źniavoleńnia pa abvinavačańni ŭ niezakonnych dziejańniach u dačynieńni da ahniastrelnaj zbroi, bojeprypasaŭ i vybuchovych rečyvaŭ — u jaho było znojdziena piać patronaŭ da palaŭničaj vintoŭki. Paśla vyzvaleńnia nad Aŭtuchovičam byŭ ustanoŭleny previentyŭny nahlad.

U turmie Aŭtuchovič adbyvaŭ pakarańnie dvojčy. Pieršy raz jon byŭ aryštavany ŭ kastryčniku 2005 hoda pa abvinavačańni ŭ niavypłacie padatkaŭ i asudžany na try z pałovaj hady pazbaŭleńnia voli.

U abodvuch vypadkach pravaabaroncy pryznavali Aŭtuchoviča palitźniavolenym, asudžanym za aktyŭnuju hramadskuju dziejnaść i baraćbu z karupcyjaj.

• 0
• 0
• 0
• 0
• 0
• 0
• 0
• 0