Siem faktaŭ pra Uładzimira Mulavina, jakomu 12 studzienia spoŭniłasia b 75 hadoŭ

Uładzimir Mulavin naradziŭsia ŭ 1941 u Śviardłoŭsku (ciapier Jekacierynburh, Rasija), vučyŭsia ŭ miascovym muzyčnym vučyliščy, pracavaŭ u sibirskich fiłarmonijach.

U 1963 zaprošany ŭ Biełdziaržfiłarmoniju. U 1968 zasnavaŭ pry joj ansambl «Lavony», jaki ŭ 1970 staŭ «Pieśniarami».

Vyvučyŭ biełaruskuju movu, kab pracavać z narodnaj pieśniaj. Dziakujučy «Pieśniaram» biełaruski falkłor i kłasičnaja paezija (Kupała, Kołas, Bahdanovič, Tank) stali viadomyja na ŭvieś SSSR. Sabraŭ załaty skład muzykaŭ: Misievič, Bartkievič, Kašaparaŭ, Tyško, Dziamieška, Dajneka, Palivoda.

U 2002 Mulavin trapiŭ u žorstkuju aŭtaavaryju i 26 studzienia 2003 pamior ad atrymanych traŭmaŭ u špitali. Pachavany na Uschodnich mohiłkach Minska.

«Pieśniary» zastajucca adnym z najbolšych kulturnych dasiahnieńniaŭ Biełarusi ŭ XX stahodździ.

Prodki Uładzimira Mulavina byli zamožnymi sibirskimi kupcami

Jany mieli svaje mahaziny, byli adukavanymi. Savieckaja ŭłada represavała ich. I ŭžo baćka Uładzimira, Hieorhij Mulavin, byŭ prostym rabočym na zavodzie «Urałmaš». Jon byŭ muzyčna adoranym, dobra ihraŭ na hitary. Hieorhij syšoŭ ź siamji da inšaj žančyny, pakinuŭšy žonku z tryma dziećmi.

Mulavin nie mieŭ skončanaj muzyčnaj adukacyi, bo jaho adličyli z druhoha kursa

Jaho pieršym nastaŭnikam muzyki byŭ palitviazień Alaksandr Naŭrocki.

Jak raskazvaŭ Mulavin, hety vypusknik Charkaŭskaha instytuta kultury i były viazień stalinskich łahieraŭ byŭ niezvyčajna talenavitym muzykam-piedahoham. Jon pieršym razhladzieŭ u Mulavinu nie tolki talent, ale i kałasalnuju pracazdolnaść. Naŭrocki zajmaŭsia sa svaim vychavancam pa šeść-siem hadzin u sutki, i ŭ vyniku Mulavin pastupiŭ u Śviardłoŭskaje muzyčnaje vučylišča. Jon vučyŭsia na adździaleńni narodnych instrumientaŭ, a samastojna asvoiŭ hitaru, fartepijana i stvaryŭ džaz-bend.

Mulavin nie mieŭ skončanaj muzyčnaj adukacyi, bo jaho adličyli z druhoha kursa za «nizkapakłonstva pierad zachodniaj muzykaj».

Rvaŭ ułasnyja noty

Patrabavalnaść Mulavina da siabie pierachodziła usiakija miežy. Kali na pieršym vykanańni pieśni publika reahavała viała, Mulavin paśla kancerta rvaŭ ułasnyja noty, i pieśnia bolš nie vykonvałasia.

Pieśni pisaŭ na dośvitku

miž 4-j i 9-j hadzinami ranicy.

Prymajučy na pracu ŭ «Pieśniary», Mulavin prasiŭ kandydata praśpiavać kuplet z «Biełaviežskaj puščy».

Kali pretendent braŭ vierchnija noty, jon moh raźličvać na ŭvachod u skład hrupy.

Try žonki, čaćviora dziaciej

U 1959 18-hadovy Uładzimir Mulavin ažaniŭsia z artystkaj Lidzijaj Karmalskaj, jakaja vystupała ŭ redkim žanry mastackaha śvistu. U 1961 u ich naradziłasia dačka Maryna, a ŭ 1975 — syn Uładzimir.

U tym samym 1975 šlub z Karmalskaj raspaŭsia, i Mulavin ažaniŭsia ź Śviatłanaj Ślizskaj. U 1976 u ich naradziłasia dačka Volha.

Druhi šlub pratrymaŭsia da 1981, kali Mulavin, raźvioŭšysia, ažaniŭsia z akciorkaj Śviatłanaj Pienkinaj. (Paznajomiŭ ich kaleha pa «Pieśniarach» Uładzisłaŭ Misievič.) U 1982 va Uładzimira i Śviatłany naradziŭsia syn Valeryj.

Brata zabili, syn zahinuŭ ad narkotykaŭ

Śmierć brata Uładzimira, Valeryja Mulavina, tak i nie była rasśledavanaja. Jon zahinuŭ u Jałcie ŭ 1973-m, paśla kancerta. Prakuratura i milicyja adrazu ahučyli viersiju: upaŭ na parapiet i raźbiŭsia. Ale «piaśniar» Uładzisłaŭ Misievič śćviardžaŭ u intervju, što Valeryja zabili kryminalniki. «Jaho prajhrali ŭ karty. Pryčym, imavierna, złačyncy pastavili na kon Vałodziu. Ale nie vielmi razabralisia, chto z bratoŭ chto, a moža, vyrašyli, što kiraŭnik — toj, chto starejšy».

U dzień śmierci brata Mulavin z «Pieśniarami» byŭ vymušany adśpiavać dva kancerty. Čynoŭniki nie dazvolili admianić ich. Kryminalnuju spravu zakryli «za adsutnaściu dokazaŭ». Valeryj Mulavin pachavany na Čyžoŭskich mohiłkach Minska.

Trahičnaj była i śmierć syna Uładzimira Mulavina — taksama Uładzimira. Jak dźvie kropli vady padobny na baćku, jon taksama byŭ muzykam i navat supracoŭničaŭ ź dziaržaŭnymi «Pieśniarami». Paśla byŭ asudžany za raspaŭsiud narkotykaŭ na turemny termin i ŭ 2006 skanaŭ u źniavoleńni. Pryčynaj śmierci, jak paviedamlałasia, było praciahłaje ŭžyvańnie narkotykaŭ.

Što datyčyć samoha Mulavina, to jaho pad kaniec žyćcia byłyja kalehi źvinavacili ŭ złoŭžyvańni ałkaholem. Z hetaha i pačalisia raskoły ŭ ansambli, kali źjavilisia «Biełaruskija pieśniary» i inšyja askołki byłoj vieličy.

Pavialičyć

• 0
• 0
• 0
• 1
• 0
• 0